1 Taẓaǧit n Musa, aryaz n AREBBI.

A Sidi inu, Cek tuɣa d Tazeddiɣt nneɣ zi jjiř ař jjiř.

2 Qbeř ma ad iřin idurar,

qbeř ma ad dd-tessuffɣed tammurt, ddunect,

wah aqa Cek d Arebbi zi řebda ař řebda.

3 Cek tejjid bnadem ad iɛqeb ɣar tɛejjajt.

Teqqared: “Ɛeqbettiw-dd tarwa n bnadem!”

4 Maɣar ařef n iseggʷusa di tiṭṭawin nnek am wass n iḍennaḍ,

wenni iɛdun am ict n nnubet n tɛessast di ǧiřet.

5 Cek tfarḍed ten, aqa aten am yiḍes.

Ƴar tuffut ggin am arrbiɛ isřawen.

6 Ɣar tuffut ittzᵉyziw arrbiɛ uca xenni ittisřaw,

ɣar tmeddit ittwamjar, ittaẓeɣ.

7 Maɣar neccin nefna s weɣḍab nnek,

nennexřeɛ zeg wesɛar nnek.

8 Cek teggid řmuɛṣiyyet nneɣ qibač nnek,

ddnub nneɣ innuffaren di tfawt n wudem nnek.

9 Maɣar marra ussan nneɣ ad ɛdun deg ufugem nnek isseggʷaden.

Nesseɛdu iseggʷusa nneɣ am ijj n usqinfi.

10 Ussan n tudart nneɣ ttekken sebɛin n iseggʷusa,

niɣ meřmi i ɣa niři nejhed, aqa tmanyin n iseggʷusa.

Min dayes d aɛuǧi, ittaru-dd tamara d řweḥran,

deɣya tᵉttekk tɛeddu u neṭṭaw ɣar din.

11 Man wen issnen řqesḥan n weɣḍab nnek,

mecḥař issaggʷad uduqqez nnek n ufugem?

12 Seřmed aneɣ ad nḥesseb ussan nneɣ,

ḥima ad dd-nawi uř iccuren s tiɣit.

13 Dweř-dd, a SIDI, ař meřmi?

Ḥinn x imsexxaren nnek.

14 Sjjiwen aneɣ ɣar uteffu s tmexsiwt nnek icewwaren,

xenni ad nesřiwřew, ad nfarḥ marra ussan nneɣ.

15 Sfarḥ aneɣ anect n wussan i d aneɣ teḥṣared,

anect n iseggʷusa i di neẓra řɣar.

16 Scen řxedmet nnek i imsexxaren nnek,

řɛezz nnek x iḥenjiren nsen.

17 Ad xaneɣ tehwa řeḍrafet n SIDI, AREBBI nneɣ,

u ḍmen Cek řxedmet n ifassen nneɣ,

wah, řxedmet n ifassen nneɣ ḍmen i-tt.