89
1 Axemmi n Itan, Azraḥi. 2 Ad ɣennjeɣ x tmexsiwt icewwaren n SIDI i řebda,
ad barrḥeɣ řaman nnek s uqemmum inu zi jjiř ař jjiř.
3 Maɣar nniɣ: “Tamexsiwt icewwaren tᵉttwabna i řebda,
aqa tḍemned řaman nnek deg ijenwan.”
4 “Necc ggiɣ ijj n Řɛahd ak-d wenni zzayi ittwafarzen,
jjuǧeɣ i umsexxar inu Dawud:
5 ‘Necc ad ḍemneɣ zzariɛet nnek i řebda,
u ad bniɣ řɛarc nnek zi jjiř ař jjiř.’ ” Silah.
6 Ijenwan ttqadan Cek x lmuɛjiza nnek, a SIDI,
uřa deg wegraw n imqeddasen ttqadan Cek x řaman nnek. ■
7 Maɣar man wen deg iseynuten izemmar ad ittwaqedd ak-d SIDI,
man wen i iǧan jar warrawen n Arebbi izemmar ad imqudda ak-d SIDI?
8 Arebbi iwɛar aṭṭas deg wegraw n imqeddasen,
marra inni d as dd-innḍen tteggʷeden zzayes.
9 A SIDI, AREBBI n řɛeskarat,
man wen ɣar iǧa tizemmar am Cek, a SIDi!
Řaman nnek ittenneḍ i Cek.
10 Cek tḥekkmed x nnfaxet n řebḥar.
Xmi dd-ttnekkaren řemwaj nnes, aqa Cek taressid i-ten.
11 Aqa třebzed Rahab am yijjen wenni issnuqqben,
tzeǧɛed řɛedyan nnek s uɣiř nnek ijehden.
12 Nnek ijenwan, nnek uřa d tammurt.
Ddunit d uɛemmar nnes teggid asen dsas. ■
13 Cek txeřqed-dd ccamal d ljanub,
Tabur d Hirmun sřiwřiwen s Yisem nnek.
14 Aqa ɣarek aɣiř i di teggid taryast,
afus nnek ijhed, afus afusi nnek ittwasgeɛɛad.
15 Tasegda d řḥeqq aqa aten d dsas n řɛarc nnek,
tamexsiwt icewwaren d řaman ittizwaren zzat i wudem nnek. ■
16 Sseɛd n řgens i issnen ad meyyzen aṣuḍi s wesruddeḥ n řbuq, a SIDI,
nitni ad uyuren di tfawt n wudem nnek.
17 Nitni ad farḥen ass marra s Yisem nnek,
uca ad dd-ttwasgeɛɛden s tsegda nnek,
18 maɣar Cek d řemřaḥet n jjehd nsen,
icc nneɣ ad ittwasgeɛɛed s řxaḍar nnek.
19 Taseddart nneɣ n useřqi n SIDI,
ajeǧid nneɣ aqa-t n Umqeddas n Israil.
20 Ict n twařa tuɣa tessiwřed di tmeẓriwt x Umtiqqi nnek, tennid:
“S ufus n ijj n bu-teɣruḍt ggiɣ twiza,
ijj wenni ittwafarzen zi řgens ssgeɛɛdeɣ-t.
21 Necc ufiɣ Dawud, amsexxar inu,
dehneɣ t s zzect iqeddsen, ■
22 maḥend afus inu ggur ad yiři imten akides,
wah aɣiř inu ad t issemḥed.
23 Řeɛdu war t issaggʷad,
u mmis n řmuɛṣiyyet war t iḥeṣṣar. ■
24 Inni t iḥeṣṣaren ad ten řebzeɣ zzat i wudem nnes,
inni t icarrhen ad ten wteɣ.
25 Řaman inu d tmexsiwt inu icewwaren, aqa aten akides i ɣa yiřin,
ad ittwasgeɛɛed yicc nnes s Yisem inu.
26 Ad ssarseɣ afus nnes x řebḥar,
afus nnes afusi x iɣezran.
27 Netta ad xafi dd-iřaɣa:
‘Aqa Cek d Baba inu, Arebbi inu, d Taṣḍart n usenjem inu!’ ■
28 Necc ad t ggeɣ d amenzu inu,
Amɛuǧi x ijeǧiden n temmurt.
29 I řebda ad ḥḍiɣ tamexsiwt inu icewwaren zzates,
u ad qqimeɣ ttᵉṭṭfeɣ s řmanet di Řɛahd inu akides.
30 Ad ẓẓuɣ zzariɛet nnes i řebda,
u řɛarc nnes min ɣa kken ussan n ujenna ǧan.
31 Mařa iḥenjiren nnes ḥeyyden x Ccariɛa inu,
war gguren ak-d lfarayiḍ inu, ■
32 mařa ssfesden tiweṣṣa inu,
war ḥeṭṭin řumurat inu,
33 xenni ad xeǧṣeɣ aɛeddu nsen s weɛmud,
řmuɛṣiyyet nsen s teyyita.
34 Maca war xasen ttekkseɣ tamexsiwt inu icewwaren,
war nekkareɣ řmanet inu.
35 War ttɣeṣṣabeɣ Řɛahd inu,
min dd-iffɣen zeg iyencicen inu,
war t ttbeddiřeɣ.
36 Necc jjuǧeɣ ict n twařa ɣar tqeddast inu:
’War ggur ad ssxarrqeɣ ɛemmarṣ x Dawud!’ ■
37 Zzariɛet nnes ad teqqim i řebda,
u řɛarc nnes ad din ibedd zzati am tfuct.
38 Netta ad iqqim ibedd i řebda am tziri,
u acehhad deg iseynuten aqa-t d amtiqqi.” Silah.
39 Maca Cek tɛarrned t ɣar uɣezdis, tenḍared t,
Cek tfuggmed x umedhun nnek.
40 Cek tenḍared Řɛahd ak-d umsexxar nnek,
tfesded tamrist n weɛzař nnes s ubeǧaɛ n temmurt.
41 Tɣeḍřed marra řeḥyud nnes,
thedmed tineddam nsen ifaryen s iɣebrawen.
42 Marra inni dd-ikkin abrid keccḍen t,
netta idweř d aseḥqar i jjiran nnes. ■
43 Cek tessgeɛɛded afus afusi n yinni t iḥeṣṣaren,
tessfarrḥed marra řɛedyan nnes.
44 Cek tessenqeřbed řeqḍeɛ n ssif nnes,
Cek tejjid t war ittɣimi ibedd deg umenɣi.
45 Cek tessbedded aẓri nnes,
řkursi nnes igellden tenḍared t ɣar temmurt.
46 Cek tessemẓid as ussan n temẓi nnes,
tedřid t s řefḍiḥet. Silah.
47 Ɣares ař meřmi ɛad, a SIDI, ad tessnuffared ixef nnek břa qeṭṭu,
ad yarɣ wesɛar nnek am tmessi?
48 Ɛqeř x řmijař n tudart inu!
Mayemmi dd-txeřqed marra arraw n bnadem amenni baṭeř?
49 Man aryaz ijehden war ittwiři řmewt,
man aryaz i ɣa ifekken řeɛmar nnes zeg ufus n řaxart? Silah. ■
50 A Sidi inu, mani ǧant tmegga n tmexsiwt nnek icewwaren n zic,
tinni x tuɣa tejjuǧed i Dawud s řmanet nnek? ■
51 A Sidi inu, ɛqeř x useḥqar n imsexxaren nnek,
nni arebbuɣ deg weḥsin inu zeg ubarru n marra řegnus, □
52 i zi d ayi sseḥqaran řɛedyan nnek, a SIDI,
i zi sseḥqaran iṣuraf n umedhun nnek.
53 Ad ittwabarek SIDI i řebda qaɛ!
Amin, wah, amin!