88
1 Izři, azehhed n ayt n Quraḥ. I umeqqran n imeɣnajen,
s teɣnint n ‘Izři n wecḍan’ ɣar řeḥṣarat.
Axemmi n Hayman, Azraḥi.
2 A SIDI, AREBBI n usenjem inu,
deg wass i di dd ɣa sɣuyyeɣ ɣarek s ǧiřet,
3 ejj xenni ad dd-tas tẓaǧit inu zzatek,
ewc amezzuɣ nnek i uřaɣi inu.
4 Maɣar řeɛmar inu ijjiwen s řmuṣibat,
tudart inu tudes-dd řaxart.
5 Necc ttwaḥessabeɣ am yenni dd-ihekkwan deg weḥfur n wenḍeř,
am ijj n weryaz umi war dayes jjhed ɛad.
6 Aqa ttwaḥuzeɣ jar imettan,
am yenni ittwanɣen inni izzřen deg wenḍeř,
inni war ten tᵉttidared ɛad,
ttwaqeḍɛen zeg ufus nnek.
7 Cek teggid ayi deg wenḍeř yuǧɣen qaɛ,
di taǧest, di řaǧaɣ.
8 Asɛar nnek idqeř xafi aṭṭas,
s marra řemwaj n lɣaḍab nnek tessdeǧed ayi. Silah.
9 Imqarraben inu tessiggʷejed i-ten xafi,
tarrid ayi d nnɛi i nitni.
Ittwabelleɛ xafi, war zemmareɣ ad dd-ffɣeɣ.
10 Tiṭṭ inu teɛmec s řeɣben.
A SIDI, ass marra ttřaɣiɣ ɣarek,
necc sswiẓẓḍeɣ ifassen inu ɣarek.
11 Ma ad tegged ict n lmuɛjiza deg imettan?
Niɣ ad dd-kkaren řexyařat n imettan, ma ad cek qadan? Silah.
12 Ma ad barrḥen s tmexsiwt nnek icewwaren deg wenḍeř,
s řaman nnek deg uhellek?
13 Ma ad ttwassnent lmuɛjizat nnek di taǧest,
tasegda nnek di temmurt n tattut?
14 A SIDI, necc ttřaɣiɣ Cek,
taẓaǧit inu tᵉttas-dd zzatek ɣar uteffu.
15 Mayemmi, a SIDI, tneṭṭared řeɛmar inu,
mayemmi tᵉttwasnuffared udem nnek zzayi?
16 Zi temẓi inu necc di řeɣben u ggureɣ ɣar unuri,
tekkseɣ isnexriɛen nnek ḍidd inu,
ttwaḥṣareɣ zzaysen.
17 Tettekk xafi řḥaduq n weɣḍab nnek,
itteḥḥa ayi useggʷid nnek.
18 Ass marra ittenneḍ ayi-dd amecnaw aman,
ittquwwar ayi-dd marra.
19 Amɛizz inu d ameddukkeř inu tessiggʷejed i-ten xafi,
iɛciren inu aqa aten ttwařeḥḥfen s taǧest.