1 I umeqqran n imeɣnajen. Zeg ayt n Quraḥ. Azehhed.

2 Cek tarḍid x temmurt, a SIDI,

tessenqeřbed tameḥbast n Yaɛqub.

3 Tekksed řmuɛṣiyyet x řgens nnek,

tedřid marra ddnub nnes. Silah.

4 Cek tmenɛed marra aduqqez nnek n ufugem,

tesstewwjed řḥaduq n weɣḍab nnek.

5 Arr aneɣ, a AREBBI n usenjem nneɣ,

ttu aɣḍab nnek xaneɣ.

6 Ma texsed ad xaneɣ tesɛared i řebda?

Ma ad tegged aɣḍab nnek ad iqqim zi jjiř ař jjiř?

7 Ma war d aneɣ tejjid ad neddar ɛawed,

ḥima ad ac ifarḥ řgens nnek? ^■  

8 Scen aneɣ-dd tamexsiwt nnek icewwaren, a SIDI,

ewc aneɣ asenjem nnek.

9 Necc xseɣ ad sřeɣ min ɣa issiweř Arebbi, SIDI,

maɣar Netta ad issiweř ak-d řgens nnes u ak-d imtiqqan nnes x řehna.

Ɣarwem, mařa nitni ad dd-dewřen ttcařan x yixef nsen.

10 Nican, aqa yudes-dd usenjem nnes i yenni zzayes itteggʷeden,

ḥima aɛuǧi nnes ad izdeɣ di temmurt nneɣ.

11 Tamexsiwt icewwaren d řaman ad mmsagaren,

tasegda d řehna ad msudumen. ^■  

12 Tidett ad teɣmi zi temmurt,

tasegda ad tessijj ɣar swadday zeg ujenna.

13 SIDI ad iwc uřa d min iṣebḥen,

tammurt nneɣ ad tewc řɣiǧet nnes. ^■  

14 Tasegda ad as tizwar zzat i wudem nnes,

ad teḥḍa jjurret n iṣuraf nnes.