1 Taẓaǧit n Dawud.

A SIDI, arr-dd amezzuɣ nnek ɣari, seř ayi,

maɣar necc di řeɣben u zeřḍeɣ.

2 Ḥḍa x řeɛmar inu, maɣar necc d amtiqqi,

a AREBBI inu, senjem amsexxar nnek, wenni xak ittcařan.

3 Ḥinn xafi, a Sidi inu,

maɣar ttřaɣiɣ-dd xak ass am ikmeř.

4 Sfarḥ řeɛmar n umsexxar nnek,

maɣar i Cek, a Sidi inu, ssgeɛɛadeɣ řeɛmar inu.

5 Maɣar Cek, a Sidi inu, d aṣebḥan u d amsameḥ,

ɣarek tamexsiwt icewwaren i marra inni ɣarek dd-ittřaɣan.

6 A SIDI, seř i tẓaǧit inu,

ḥekkar i tmijja n uḥeccem inu.

7 Deg wass n řeḥṣaret inu ttřaɣiɣ-dd ɣarek,

maɣar Cek ad xafi dd-tarred. ^■  

8 Jar irebbiten war iǧi uřa d ijjen amecnaw Cek, a Sidi inu,

u war din min yarwesen di tmegga nni teggid. ^■  

9 Marra řegnus i teggid, ad dd-asen,

ad aḍaren zzat i wudem nnek, a Sidi inu,

ad ssɛuǧen Isem nnek.

10 Maɣar Cek d ameqqran u Cek d wenni itteggen lmuɛjizat,

Cek weḥḥdek d AREBBI i teǧid.

11 Scen ayi abrid nnek, a SIDI, ḥima ad uyureɣ di tidett nnek,

smun uř inu maḥend ad ggʷedeɣ Isem nnek. ^■  

12 A Sidi inu, AREBBI inu, xseɣ ad Cek qadiɣ s marra wuř inu,

ad cennɛeɣ Isem nnek i řebda qaɛ.

13 Maɣar tamexsiwt nnek icewwaren temɣar xafi,

Cek tessnejmed řeɛmar inu zi řaǧaɣ n řaxart.

14 A AREBBI, imɛeffaren kkaren-dd akidi,

u bandiyyat n ayt n bu-řexcunet arezzun ad nɣen řeɛmar inu.

Cek war ɣarsen teǧid qibač i tiṭṭawin nsen. ^■  

15 Maca Cek, a Sidi inu, d AREBBI d arḥim d uḥnin,

ɣarek ttasiɛ n řxaḍar uřa d tamexsiwt icewwaren d řaman mɣaren. ^■  

16 Xzar-dd ɣari u ḥinn xafi,

egg jjehd nnek deg umsexxar nnek,

uca senjem mmis n tayya nnek.

17 Egg ict n řeɛřamet di ṭṭweɛ inu,

ḥima inni d ayi icarrhen ad t ẓaren ad sseḍḥan,

maɣar Cek, a SIDI, tewcid ayi afus u tessfewwjed xafi.