1 I umeqqran n imeɣnajen, s teɣnint n Ujitti.

Zeg ayt n Quraḥ. Azehhed.

2 Mammec ttɛizzent tzeddiɣin nnek,

a SIDI n řɛeskarat!

3 Řeɛmar inu dayes meẓri, wah ifenna s uweḥḥec

x řemraḥat n SIDI,

uř inu d ddat inu sřiwřiwen i Arebbi iddaren. ^■  

4 Uřa d ẓẓawec ittaf ɛad ict n taddart,

u tafarǧest tufa ijj n řɛucc i yixef nnes

i di tessrussa issḍawen nnes,

ɣar iɛalṭaren nnek, a SIDI n řɛeskarat,

Ajeǧid inu d AREBBI inu!

5 Sseɛd nsen i yinni izeddɣen di Taddart nnek,

aqa-ten ttṣebbaḥen i Cek břa qeṭṭu. Silah.

6 Sseɛd n iwdan inni ittafen jjehd nsen dayek,

inni iḥeṭṭan ibriden igeɛɛden ɣar Zzawect nnek Tameqqrant deg wuř nsen.

7 Xmi ttcuqqan deg ijj n řewḍa n teɣzurt n tcejjura n umettin,

arrin t d řɛunṣar.

Uřa d anẓar amezwaru ad ten issduři s lbarakat.

8 Nitni gguren zi jjehd ař jjehd,

ad dd-banen ɣar AREBBI di Ṣihyun.

9 A SIDI, AREBBI n řɛeskarat, seř i tẓaǧit inu,

sḥess, a AREBBI n Yaɛqub! Silah.

10 A AREBBI, Cek d taseddart nneɣ n useřqi,

aqa xzar ɣar wudem n umedhun nnek!

11 Maɣar ijj n wass di řemraḥat nnek iḥřa x wařef n wussan nneɣni.

Maɛlik ufiɣ ad beddeɣ x tnebdat n Taddart n AREBBI inu,

uřa d atlaɛ deg iqiḍan n tuɛeffna.

12 Maɣar SIDI AREBBI d tafuct d tseddart i useřqi,

SIDI ad iwc aḥinni d uɛuǧi.

Netta war issɛizzi řxar deg inni igguren s řekmaret.

13 A SIDI n řɛeskarat,

sseɛd n bnadem nni dayek ittiqqan. ^■