1 Izři. Azehhed n Asaf.

2 A AREBBI, war sseɣd,

war ttegg ixef nnek d adehcur,

war seqqar ca, a Arebbi.

3 Maɣar xzar, řɛedyan nnek ttarruǧuden,

inni Cek icarrhen ssgeɛɛden azeǧif.

4 Ttxarrṣen deg ict n tmeɛmuč di tnuffar ḍidd i řgens nnek,

ttemcawaren x yenni ittwaḥeṭṭan zzayek.

5 Qqaren: “Asem-dd, ejj aneɣ ad ten nteḥḥa am řgens,

ařami war ittidar ɛad deg yisem n Israil.”

6 Maɣar ttemcawaren s wuř d ijj,

aqa tteggen ijj n řɛahd ḍidd i Cek:

7 iqiḍan n Idum d ayt n Ismaɛil,

Mu’ab d ayt n Hajar,

8 Jabal d Ɛammun d Ɛamaliq,

Filicit d imezdaɣ n Ṣur.

9 Uřa d Accur immarni ɣarsen.

Nitni tuɣa aten d afus ijhed i ayt n Luṭ. Silah.

10 Egg asen am Midyan d Sisara,

am Yabin ɣar yeɣzar n Qicun.

11 Nitni ttwateḥḥan ɣar Ɛayn-Dur,

dewřen d řeɣbar x temmurt.

12 Egg i-ten d tarwa n taṣiřet nsen am Ɣurab d Di’b,

marra ayt n jjehd nsen am Zabaḥ d Ṣalmunaɛ,

13 inni iqqaren:

“Ejj aneɣ ad neṭṭef tizeddiɣin n AREBBI i yixef nneɣ d řwart.”

14 A AREBBI inu, egg i-ten am yijj n uqellij ittennḍen di řeɛwin,

am uřum zzat i wudem n usemmiḍ.

15 Amecnaw timessi tessreqqa azɣar,

amecnaw aceɛɛař ittett idurar, ^□  

16 aẓẓeř ammu xasen s usemmiḍ nnek,

snexřeɛ i-ten s tḥaryaḍt nnek.

17 Řeḥḥef udem nsen s řeḥya,

maḥend nitni, a SIDI, ad arzun x Yisem nnek.

18 Ejj i-ten ad barrqen u ad arejfen i řebda,

ejj i-ten ad sseḍḥan uca ad ttwahellken,

19 ḥima ad ssnen, aqa Cek waha i ɣar iǧa Yisem ‘SIDI’,

Amɛuǧi x marra tammurt.