1 I umeqqran n imeɣnajen. S teɣnint n ‘Tlillicin’. Cchadet n Asaf. Azehhed. ^□  

2 Seř, a Ameksaw n Israil,

Cek d wenni yarekkwesen Yusuf am wuǧi,

Cek d wenni ittɣiman x ikiruben, ban-dd di tissiqt! ^□  

3 Sekkar jjehd nnek zzat i wudem n Ifrayim d Binyamin d Manassa,

as-dd ḥima ad aneɣ tfekked.

4 A AREBBI, arr aneɣ-dd u ejj udem nnek ad yarɣ,

xenni ad nettwafekk. ^■  

5 A SIDI, AREBBI n řɛeskarat,

mecḥař i ɣa tekked tᵉttxeyyaqed zi tẓaǧit n řgens nnek?

6 Cek tessecced ten s weɣrum n imeṭṭawen,

tarrid ten ad swen imeṭṭawen s ijj n řmijař ittwaggen.

7 Cek teggid aneɣ d ict n tcamma n imcubbecen i jjiran nneɣ,

řɛedyan nneɣ stehzazen jar asen. ^■  

8 Sbedd aneɣ, a AREBBI n řɛeskarat,

ejj udem nnek ad yarɣ,

xenni ad nettwafekk.

9 Cek tqeřɛed ict n tzayart zi Miṣra,

tuẓẓřed x řegnus, uca teẓẓud-i-tt din.

10 Cek tesswejded as amcan u tarrid tt-i-dd ad tewwet iẓewran,

tɛemmar tzayart marra tammurt.

11 Ttwassduryen idurar s tiři nnes,

ticejjura n tengelt n Arebbi s řefruɛ nnes.

12 Tegga tiseḍwin nnes ad awḍent ař řebḥar,

ifetwan nnes iziyzawen ař iɣzar n Lfuraṭ.

13 Mayemmi tɣeḍřeḍ iɣebrawen nnes,

ařami marra inni dd-ittekken x webrid řeqqḍen tt?

14 Iřef zeg wezɣar iqřeb tazayart,

mummu n yeyyar aqa ihda i-tt. ^□  

15 A AREBBI n řɛeskarat, dweř-dd ɣarneɣ,

sijj-dd zeg ujenna, u xzar, arzef tazayart-a

16 u tthilla di tzayart tenni iẓẓu ufus nnek afusi,

di tmemmit nni tessjehded i yixef nnek.

17 Aqa tᵉttwassecmeḍ s tmessi, tᵉttwaqḍeɛ.

Zeg useggʷed n wudem nnek ad weddaren.

18 Ejj afus nnek ad yiři ak-d weryaz n ufus nnek afusi,

ak-d mmis n bnadem wenni tessjehded i yixef nnek.

19 Xenni war xak nḥeyyed ca.

Ejj aneɣ ad neddar, xenni ad nřaɣa x Yisem nnek.

20 A SIDI, AREBBI n řɛeskarat, sbedd aneɣ-dd,

ejj udem nnek ad yarɣ,

xenni ad nettwafekk.