1 I umeqqran n imeɣnajen. S teɣnint n Ujitti. N Asaf.

2 Sřiwřem i AREBBI, jjehd nneɣ,

duqqzem s řefraḥet i AREBBI n Yaɛqub.

3 Sgeɛɛdem ict n yezři n uṣebbeḥ, awi abendir,

řgambri miẓid d lharpa.

4 Ṣuḍem deg uyicc n icarri ɣar ubeddi n uyur,

ɣar tziri iqefřen, ɣar wass n řɛid nneɣ.

5 Maɣar ta d tawṣeyyet i Israil,

ict n lfariḍa n AREBBI n Yaɛqub.

6 Igga i-tt d cchadet di Yusuf,

řami dd-iffeɣ ḍidd i temmurt n Miṣra.

Aqa sřiɣ ijj n yiřes war d as fehmeɣ. ^□  

7 Taɣruḍt nnes fekkeɣ tt zi ddqeř,

ifassen nnes arxun zi tsuǧet i tuɣa yarebbu.

8 Cek třaɣid di řeḥṣaret u Necc fekkeɣ cek zzayes.

Necc arriɣ-dd xak zeg wexxam innuffaren n wajjaj,

ɣar waman n Mariba qeǧbeɣ cek. Silah.

9 Seř, řgens inu, xenni Necc ad cehdeɣ di řwest nnek, a Israil,

mařa xenni tuɣa texsed ad ɣari dd-tesřed.

10 War ɣarek ittiři ijj n arebbi d aɣrib,

war ttaḍar uřa i yijj n arebbi i war tessined.

11 Necc d SIDI, AREBBI nnek, wenni cek dd-issuffɣen zi Miṣra.

Arzem aqemmun nnek u Necc ad t ccureɣ.

12 Maca řgens inu war isři ca ɣar tmijja inu,

Israyil war d ayi ixs.

13 S uyenni jjiɣ ten i wuř nsen iqesḥen,

ařami i ɣa uyuren di řecwar n uzeǧif nsen.

14 Mři dd-isřa ɣari řgens inu,

mři Israil ixs ad yuyur deg ibriden inu!

15 Xenni mammec deɣya iři qḍiɣ x řɛedyan nsen,

arriɣ afus inu ḍidd i yenni ten iḥeṣṣaren.

16 Inni icarrhen SIDI ad ɣares dd-dewřen ttmuruden deǧen,

řweqt n uxeǧeṣ nsen ad yiři i řebda.

17 Iři aqa iwca as macca zi lemliḥ n yirden,

wah, iři s tamment zi jjarf ssjjiwneɣ cek.