78
1 Axemmi n Asaf. A řgens inu, ewc amezzuɣ i Ccariɛa inu!
Meyyřem amezzuɣ nwem ɣar wawařen n uqemmum inu.
2 Necc ad arzmeɣ aqemmun inu s wawař iweznen,
ad barrḥeɣ řemɛani innuffaren zeg wecḥař uya, ■
3 inni nesřa u nessen,
inni d aneɣ ḥajan ibabaten nneɣ.
4 War ten netteffar zeg iḥenjiren nsen,
zi jjiř i dd ɣa yasen.
Ad nbarreḥ s tmegga iṣebbḥen n SIDI,
u s tmegga ijehden d lmuɛjizat nni tuɣa igga.
5 Maɣar Netta igga ict n cchadet di Yaɛqub,
uřa d ict n Ccariɛa di Israil,
nni tuɣa yumur i ibabaten nneɣ,
maḥend ad tt ssɣaren i iḥenjiren nsen, ■
6 maḥend jjiř i dd ɣa yasen ad issen,
iḥenjiren nni dd ɣa ittwaxeřqen awarni asen,
u xenni uřa d nitni ad kkaren ad tt sseɛdun i iḥenjiren nsen,
7 maḥend nitni ad ssarsen řaman nsen x AREBBI,
war ttᵉttun ca timegga n AREBBI,
maca ad ḥḍan tiweṣṣa nnes,
8 war ttiřin amecnaw ibabaten nsen,
ijj n jjiř aɣennan u iɣewwɣen,
ijj n jjiř s wuř war imten u s arruḥ iɣdaren Arebbi. ■
9 Ayt n Ifrayim, imjebbaden n řqews,
ɛeqben deg wass n umenɣi.
10 War ḥḍan Řɛahd ak-d AREBBI,
ugin ad uyuren di Ccariɛa nnes.
11 Ttun timegga nnes d lmuɛjizat,
tinni i d asen isscen.
12 Zzat i tiṭṭawin n ibabaten nsen igga Netta ict n lmuɛjiza,
di temmurt n Miṣra, deg iyyar n Ṣuɛan.
13 Netta ibḍa řebḥar uca isseẓwa ten zzayes,
ijja aman ad bedden am weɣbar. ■
14 Netta issqebbeḍ i-ten s wass s useynu,
s ǧiřet marra s tfawt n tmessi. ■
15 Netta ibḍa řejruf di řexřa,
uca iwca i řgens ad isu s ufeyyeḍ,
amecnaw zeg waman yuǧɣen. ■
16 Netta ijja řɛunṣarat ad feyyḍent zi sseǧaḥ,
Netta ijja aman ad hwan am iɣezran.
17 Maca nitni arnin di ddnub nsen xas,
arnin deg wesɛar deg Umɛuǧi x kuřci
umi tuɣa aten di tnezruft yuẓɣen.
18 Nitni jarrben Arebbi deg wuř nsen,
umi ttaren macca ɣar meẓri n řeɛmar nsen.
19 Ssiwřen ḍidd i AREBBI, nnan:
“Ma izemmar Arebbi ad issewjed ṭṭabřa di řexřa? ■
20 Xzar, Netta iwta di teṣḍart,
ařami dd-uzzřen zzayes waman d iɣezran.
Ma izemmar Netta ad iwc aɣrum,
niɣ issewjed aysum i řgens nnes?” ■
21 S uyenni isřa SIDI uca iffugem.
Timessi tarɣa ḍidd i Yaɛqub,
ikkar-dd weɣḍab nnes ḍidd i Israil, ■
22 maɣar war ttciřin ca x AREBBI,
war uminen deg usenjem nnes.
23 Netta yumur iseynuten sennej,
u yarzem tiwwura n ujenna.
24 Ifarreɣ-dd xasen ‘manna’,
iwca asen imendi zeg ujenna. ■
25 Marra ccin aɣrum n yinni daysen řɛezz.
Issekk asen macca nsen ɣar webrid ařami jjiwnen. □ ■
26 Netta igga asemmiḍ n manis dd-tneqqar tfuct ad ikkar deg ujenna,
s tzemmar nnes issekk-dd asemmiḍ n ljanub. ■
27 Ijja aysum ad xasen dd-iwḍa am wenẓar n tɛejjajt,
ijḍaḍ s wafriwen am ijdi n řebḥur.
28 Netta ijja i-ten ad wḍan di řwest n řmargeḥ n řɛeskar,
ɣar marra iɣezdisen n tzeddiɣin nsen.
29 Nitni ccin u jjiwnen qaɛ,
ksin min di tuɣa ḍemɛen.
30 Nitni tuɣa ɛad war ttwafekken zeg weḍmaɛ nsen,
macca tuɣa ɛad deg uqemmum nsen,
31 umi xasen ikkar weɣḍab n AREBBI.
Netta inɣa zeg inni iǧan d imcennɛen qaɛ jar asen,
yarra-dd inni ittwafarzen zi Israil
ad aḍaren ɣar tɛejjajt n temmurt. ■
32 Maca qaɛ amenni arnin ggin ddnub,
war uminen di lmuɛjizat nnes.
33 Netta ijja ussan nsen ad ɛdun am ijj n řefwar,
iseggʷusa nsen am ict n řɛurret.
34 Xmi ten i ɣa ineɣ, arzun x Arebbi,
dewřen-dd ɣares, arzun xas s cḍaret.
35 Nitni ɛeqřen aqa AREBBI d Taṣḍart nsen,
u Arebbi, Amɛuǧi x kuřci, Amefdi nsen. □
36 Maca nitni ssniɛmiřen zzates s uqemmum nsen,
s yiřes nsen ssxarriqen xas.
37 War tuɣi uř nsen imten akides,
war uyuren s řmanet ak-d řɛahd nnes.
38 Netta maca tuɣa yareḥḥem daysen u ifda řmuɛṣiyyet,
war yareddeǧ, maca aṭṭas n twařawin ijja zeg weɣḍab nnes,
u war issekkar marra asɛar nnes.
39 Netta iɛqeř aqa nitni mɣir d aysum waha,
d ijj n usemmiḍ iɛeddu war dd-ittɛiqqib.
40 Mecḥař n twařawin sɛaren t di řexřa,
ggin as řeḥriq di tnezruft!
41 Twařa awarni tenneɣnit qeǧben Arebbi,
ggin řeḥriq i Umqeddas n Israil.
42 War xarrṣen ca ɛad deg ufus nnes,
deg wass nni řami ten ifda zeg ufus n yijjen i-ten iḥṣaren, □
43 ařami igga řeɛřamat di Miṣra ,
uřa d lmuɛjizat nnes deg iyyar n Ṣuɛan,
44 ařami igga iɣezran nsen ad dewřen d idammen,
uřa d marra řɛunṣarat nsen,
ḥima nitni war zemmaren ad zzaysen swen ɛad. ■
45 Issekk jar asen ijj n weyřaf n ibeɛɛac i ten iccen,
uřa d iqarqriwen nni ten iteḥḥan. ■
46 Netta iwca řɣiǧet nsen i tmuɣri iṣarrḍen,
uřa d ṣṣabet nsen i tmuɣri. ■
47 Inɣa tazayart nsen s tebrurri,
uřa d izemmuren nsen s ibquqen imeqqranen n tebruri. ■
48 Netta ijja řmař nsen i ubruri,
tiḥimriwin nsen i wassamen.
49 Netta issekk řḥaduq n weɣḍab nnes jar asen,
amuzzar d tefqeḥt d řḥeṣran,
umi dd-issekk lmalakat s jjrayeḥ.
50 Netta iseggem ijj n umesraq i weɣḍab nnes,
war issɛizz x řeɛmar nsen zi řmewt,
isseɛdu řmař nsen i ṭṭaɛun. ■
51 Netta inɣa marra imenza di Miṣra,
amezwaru n tzemmar n teryast deg iqiḍan n Ḥam. ■
52 Igga řgens nnes ad issgeɛɛed am wuǧi,
issqebbeḍ i-ten am ict n tḥimart di řexřa.
53 Indeh i-ten di řaman, war ggʷiden walu,
maɣar řebḥar idřa řɛedyan nsen. ■
54 Iwyi ten ɣar temmurt n Zzawect nnes Iqeddsen,
ɣar wedrar-a nni d ikseb ufus afusi nnes.
55 Issuffeɣ řegnus zzat i wudem nsen,
u igga ad asen dd-tekkar tesɣart nsen s ufiřu n řeɛbar,
u issezdeɣ tiqebbař n Israil deg iqiḍan nsen. ■
56 Maca nitni qeǧben t u sɛaren AREBBI, Amɛuǧi x kuřci,
war hḍin cchadat nnes.
57 Nitni dewřen ɣar ḍeffar,
ggin s řeɣdar am ibabaten nsen.
Nitni weddaren am ict n fřitca n řqews i iteffɣen s řexdeɛ.
58 Sɛaren t s řegɛudi nsen i x wehhben tiɣarṣa,
arrin t ad yasem s řexyařat nsen ineqcen ■
59 AREBBI isřa man aya uca ittwasarɣ weɣḍab nnes,
idweř iɛiff aṭṭas zi Israil.
60 Netta ijja Tazeddiɣt nnes di Cilu,
Aqiḍun mani tuɣa izeddeɣ jar iwdan.
61 Netta yarra jjehd nnes ɣar tmeḥbast,
uřa d talwizt nnes ɣar ufus n wenni t iḥeṣṣaren. ■
62 Netta isellem řgens nnes i ssif,
yarɣa weɣḍab nnes x tesɣart nnes.
63 Timessi tecca iḥudriyyen nsen,
tiɛzariyyin nsen war xasent dd-iwyen iɣennijen.
64 Ikehhanen nsen wḍan s ssif,
u tijjař nsen war runt ca. ■
65 Xenni ifaq-dd Sidi inu amecnaw ca n ijj i tuɣa iṭṭṣen,
amecnaw ijj n bu-teɣruḍt nni isɣuyyu zi binu.
66 Netta iwta wenni t iḥeṣṣaren ɣar ḍeffar,
igga daysen řefḍiḥet i řebda. ■
67 Aqiḍun n Yusuf inḍar i-t,
taqbič n Ifrayim war tt ifarz.
68 Ifarz taqbič n Yahuda,
adrar n Ṣihyun wenni tuɣa ittexs.
69 Ibna Zzawect nnes Iqeddsen am ijenwan yuɛřan,
am temmurt nni issemten i řebda.
70 Ifarz amsexxar nnes Dawud,
iksi t zi řkurit n wuǧi. ■
71 Ijja i-t ad dd-yas zi ɣar ḍeffar n wuǧi,
maḥend ad yarwes Yaɛqub, řgens nnes,
uřa d Israil, řwart nnes. ■
72 Netta yarwes i-ten ɛlaḥsab řeṣfayet n wuř nnes,
igewwed i-ten s ufus izemmaren.