77
1 I umeqqran n imeɣnajen. Sadu ufus n Yadutun. Azehhed n Asaf.
2 Necc ssgeɛɛdeɣ tmijja inu ɣar AREBBI uca řaɣiɣ,
ssgeɛɛdeɣ tmijja inu ɣar AREBBI,
Netta ad ayi iseř.
3 Deg wass n řeḥṣaret inu arzuɣ Sidi inu.
S ǧiřet sswiẓẓḍeɣ afus inu břa ma ad as arxuɣ,
řeɛmar inu yugi ad ittwaɛezza.
4 Umi tuɣa ttidareɣ AREBBI, xenni ttzehhareɣ, ttxemmameɣ,
xenni yarxu buḥbeř inu. Silah.
5 Cek tarred tiṭṭawin inu ad qqiment faqent,
nhewřeɣ, war ssiwřeɣ.
6 Necc ttxemmameɣ deg wussan n wecḥař uya,
deg iseggʷusa n ikuden iɛdun aṭṭas zeg wami.
7 Necc ttidareɣ deg uzenzun inu s ǧiřet,
xmi ttxemmameɣ deg wuř inu u buḥbeř inu yarezzu:
8 Ma ad aneɣ inḍar Sidi inu i řebda,
u war xafi ittḥinni ɛad?
9 Ma tbedd tmexsiwt nnes icewwaren i řebda?
Ma ittwabḍeř lwaɛd zi jjiř ař jjiř?
10 Ma ittu Arebbi aḥinni nnes?
Ma deg weɣḍab nnes ibelleɛ arreḥmet nnes?” Silah.
11 Nniɣ: “Wa d řeɛdab inu,
aqa d iseggʷusa zeg ufus n Umɛuǧi x kuřci.”
12 Necc ad idareɣ timegga n SIDi,
ad ɛeqřeɣ x lmuɛjizat nnek n zic.
13 Necc ad xemmameɣ di marra řexdayem nnek,
ad ssiwřeɣ x marra min teggid.
14 A AREBBI, abrid nnek aqa di tqeddast i yeǧa!
Man wen i yeǧan d Arebbi ameqqran am AREBBI?
15 Cek d Arebbi wenni itteggen lmuɛjizat,
Cek tessecned tizemmar nnek jar řegnus. ■
16 Cek tefdid řgens nnek s uɣiř nnek,
tarwa n Yaɛqub d Yusuf. Silah.
17 Aman ẓrin Cek, a AREBBI, aman ẓrin Cek uca arjijen,
wah aman yuẓɣen nnhewřen. ■
18 Iseynuten ideqqřen farrɣen-dd aman nsen,
iseynuten yuɛřan ssgeɛɛden tmijja nsen,
u fřitcat n řqews nnek ḍwint da d diha. □ ■
19 Ittenneḍ řḥess n wajjaj nnek,
assamen ggin tafawt x ddunect,
tammurt tenhezz tarjij.
20 Abrid nnek icuqq di řebḥar,
amesraq nnek deg waman imeqqranen,
war binen ɛad iṣuraf n iḍaren nnek.
21 Cek tnedhed řgens nnek am ict n tḥimart n wuǧi,
s ufus n Musa d Harun. ■