1 I umeqqran n imeɣnajen. Ak-d uzenzun.

Azehhed n Asaf, izři.

2 AREBBI ittwassen di Yahuda,

Isem nnes d ameqqran di Israil.

3 Aɛucci nnes aqa-t di Calim,

Tazeddiɣt nnes di Ṣihyun.

4 Dinni yarẓa fřitcat yareqqen n řqews,

taseddart n useřqi d ssif uřa d amenɣi. Silah.

5 Tessaggʷaded u tjehded i teǧid

x idurar nni immeẓren di tkeccaḍt.

6 Inni ijehden deg wuř ttwakeccḍen.

Nitni nnudmen, ṭṭṣen,

uřa d ijj zeg iryazen imeḥḍen war izemmar ad immɛařa.

7 S uweddeb nnek, a AREBBI n Yaɛqub,

iɣarq ukarru d uyis deg yiḍes.

8 Cek, wah Cek tessaggʷaded,

wi izemmaren ad iqqim ibedd zzat i wudem nnek,

xmi dd ɣa ikkar weɣḍab nnek?

9 Zeg ujenna teggid ad ittwaseř řḥukm.

Teṭṭef teggʷudi tammurt uca tesseɣd,

10 umi ikkar AREBBI maḥend ad icarreɛ,

ḥima ad ifekk marra imhinen n temmurt. Silah.

11 Maɣar afugem n iwdan ad Cek iqada,

min iqqimen n wesɛar ad t tmenɛed.

12 Wcem lwuɛud u ggem zzaysen zzat i SIDI, AREBBI nwem.

Ejj marra inni d as dd-innḍen

d awyen ṣṣdaqi i wenni ittxeṣṣa ad zzayes ggʷeden,

13 wenni ittekksen i řḥukkam buḥbeřat nsen,

wenni zzayes tteggʷden ijeǧiden n temmurt.