1 I umeqqran n imeɣnajen. ‘War ttareddeǧ!’ Azehhed n Asaf. Izři.

2 Neccin nettqada Cek, a AREBBI, nettqada!

Aqa Isem nnek yudes, aqa lmuɛjizat nnek ssawařen x man aya.

3 Maɣar Necc ad ṭṭfeɣ řḥař ittwaggen,

ad ggeɣ ccreɛ s řḥeqq.

4 Tammurt ak-d marra imezdaɣ nnes fesyen,

maca Necc ssmettneɣ ipilaren nnes. Silah.

5 Necc nniɣ i ibuhařiyyen: “War tteggʷedem ca!”,

i iɛeffanen: “War ssgeɛɛadem icc nwem!

6 War ssgeɛɛadem icc nwem ammu sennej,

war ssawařem s nnfaxet!”

7 Maɣar asgeɛɛed war dd-ittas zi ccarq,

niɣ zi řɣarb uřa zi řexřa. ^□  

8 Maɣar AREBBI d řqaḍi.

Netta issehekkʷa ijjen u issgeɛɛad wenneɣni.

9 Maɣar aqa din ijj n řkas deg ufus n SIDI,

binu ittegg kuffu, ittwaxeǧaḍ marra.

Netta ittkebba zzayes.

Marra iɛeffanen n temmurt ad ẓemmen uřa d řexmira nnes umi zzayes i ɣa swen.

10 Necc ad t barrḥeɣ i řebda qaɛ,

ad zehhdeɣ i AREBBI n Yaɛqub.

11 Necc ad zedmeɣ marra accawen n iɛeffanen,

accawen n imseggaden ad ttwasgeɛɛden.