1 Axemmi n Asaf.

Mayemmi, a AREBBI, tenḍared i řebda?

Mayemmi i ɣa yarɣ weɣḍab nnek x wuǧi n ddmani n tarewsa nnek?

2 Xemmem di tmesmunt nnek nni tuɣa tkesbed zeg wecḥař uya,

taqbič n tesɣart n řwart nnek tenni tefdid,

adrar n Ṣihyun wenni x tuɣa tzeddɣed.

3 Sgeɛɛed iṣuraf nnek ɣar min yareddǧen i řebda,

řeɛdu yarra marra di Zzawect Iqeddsen d řxarbet.

4 Inni tuɣa Cek iḥeṣṣaren ssbuɛruten di řwest n imucan nnek n umsagar,

ssbeddan řeɛřamat nsen d řeɛřamat.

5 Aqa netta idweř ittwassen am weryaz issgeɛɛed ccwaqar di cbarq iqqnen,

6 u xenni arẓin marra inqacen

jmiɛ s ccaqur d ifḍisen.

7 Nitni qqeden timessi i Tzawiyyin nnek Iqeddsen,

aqa ɛarran Tazeddiɣt n Yisem nnek ař tammurt. ^■  

8 Nitni nnan deg wuř nsen: “Ejj aneɣ ad tent nareddeǧ marra!”

Ammu i ssarɣen marra imucan n umsagar n Arebbi di temmurt.

9 Řeɛřamat nneɣ war tent nettwiři ɛad,

war din uřa d ijj n unabi ɛad,

uca uřa d ijj jar aneɣ issen ař meřmi ɛad.

10 Ař meřmi, a AREBBI, ad zzayek istehza wenni iḥeṣṣaren?

Ma ad iceqqef řeɛdu i řebda deg Yisem nnek?

11 Mayemmi i tᵉttegged ad dayneɣ ismeḥ afus nnek, afus nnek afusi?

Suffuɣ i-t zeg weḥsin n upartessu nnek,

qḍa xasen. ^□  

12 Zeg wecḥař uya aqa AREBBI d Ajeǧid inu.

Netta d wenni i dd-ittawyen isenjamen di řwest n temmurt.

13 S tzemmar nnek tfetqed řebḥar,

izeǧifen n řhaycat teddzed i-ten x waman. ^■  

14 Cek třebzed izeǧifen n ‘Liviyatan’,

tewcid i-t d macca i řewḥuc n řexřa. ^□  

15 Cek tarrid řɛunṣar d teɣzart ad dduqqzen,

Cek tessiẓɣed iɣezran ittazzřen břa qeṭṭu. ^■  

16 Ass nnek, nnek uřa d ǧiřet,

Cek teggid din tafawt d tfuct. ^■  

17 Cek tessmetned marra iymiren n temmurt,

anebdu d tgerst aqa teggid asen tifras nsen.

18 Ɛqeř x man aya: řeɛdu isseḥqar SIDI,

ijj n řgens abuhaři iceqqef deg Yisem nnek.

19 War ttic řeɛmar n tejlilleḥt nnek i řewḥuc,

war tᵉttu i řebda tudart n řmusakin nnek.

20 Xzar ɣar řɛahd nnek,

maɣar deg imucan n ṭṭřam di temmurt aqa daysen tudrin ɛemmarent s lɛunf.

21 War ttejji wenni ittwaḥeṣṣaren ad dd-iɛqeb s useḍḥi,

ejj řmeskin d umezřaḍ ad ṣebbḥen Isem nnek.

22 Kkar bedd, a AREBBI, belleɛ ddeɛwet nnek,

xemm mammec Cek isseḥqarran ibuhařiyyen ass imun.

23 War ttᵉttu ca aɣuyyi n iɣrimen nnek,

asbuɛar n yinni i xak iɣewwɣen

ittgeɛɛad ɣar ujenna břa aqeṭṭu.