ADLIS WISS TŘATA: IZEHHIDEN 73-89
73
1 Azehhed n Asaf. Wah, AREBBI d aṣebḥan i Israil, i yenni s wuř iṣfan.
2 Necc maca, ɛřaḥař tuɣa iḍaren inu ffɣen zeg webrid,
war iqqim walu ad ḥřuǧḍen iṣuraf inu.
3 Maɣar tuɣa usmeɣ zeg ibuhařiyyen,
řami ẓriɣ aqa iɛeffanen mliḥ i ǧan. ■
4 Maɣar war din bu iceddiyen ɣar řmewt nsen,
u ṣṣulṭa nsen aqa ibedd nican.
5 Nitni war carrcen deg warber n iwdan,
war ttwařeqqfen am wezyen ameqqran n bnadem.
6 S uyenni tᵉttayeř asen-dd nnfaxet am tseddect ɣar yiri nsen,
uca iřeḥḥef asen lɛunf am ijj n warruḍ.
7 Tiṭṭawin nsen ttwaffɣent zi tadunt,
ɛeddun řexyařat n wuř nsen.
8 Nitni stehzan u s bṭayṭay ssawařen x řɣar, x ddeǧ,
aqa ssawařen-dd zi sennej.
9 Nitni arezzmen uqemmum nsen x ujenna,
řhard nsen iggur x temmurt.
10 S uya inneqřeb řgens nsen ɣar da,
aman ifeyyḍen ttsekkafen ten nitni.
11 Qqaren: “Mammec i ɣa issen AREBBI man aya?”
“Ma aqa din tussna x man aya ɣar Umɛuǧi x kuřci?”
12 Xzar, aqa aten d iɛeffanen!
Ɛad ddaren řebda di řhudnet,
u sswesɛen agřa nsen.
13 S tidett, amenni waha ssizedgeɣ uř inu,
u ssirdeɣ ifassen inu di tazdugi.
14 Ass am imun necc tiyyita dayi,
kuř ṣṣbeḥ tᵉttwarebbiɣ.
15 Mařa nniɣ: “Ad ssiwřeɣ ta d ta!”,
xzar, iři ɣdareɣ jjiř n iḥenjiren nnek.
16 Ittřiɣ ayi zemmareɣ ad fehmeɣ aya,
maca di tiṭṭawin inu ittawi-dd mɣir tamara ibeṭṭřen,
17 ɣares ařami udfeɣ ɣar Tzawiyyin Iqeddsen n AREBBI,
u fehmeɣ taneggarut nsen.
18 Wah, Cek tessrusid ten x imucan itteḥruǧuḍen,
Cek tɣeṭṭřed ten d řxirbat.
19 Mammec dewřen ttwareddǧen deg ict n tecti,
ttwamḥan u ttwaqḍan s iceřwawen issaggʷaden.
20 Am tarjit ɣar ufaqi, a Sidi inu,
ammu i ɣa tesseḥqared abeyyen n řexyař nsen xmi dd ɣa tfaqed.
21 Maɣar uř inu tuɣa ittwasarzeg di řweqt nni,
ittejju ayi řeḥriq di tiẓẓař inu. □
22 Necc tuɣa ayi d aqeffuḥ,
tuɣa ayi am ijj n řweḥc ameqqran ɣarek.
23 Ɛad maca řebda aqa ayi ɣarek,
Cek tᵉṭṭfed ayi zeg ufus afusi inu.
24 Cek ad ayi tgewwded s ccwar nnek,
u awarni man aya ad ayi teksid ɣar uɛuǧi nnek.
25 Man wen i ɣari deg ujenna ḥaca Cek?
Akidek war tzemmar uřa d ict n tmesřact di temmurt ad ayi tarḍa.
26 Mařa arrimet d wuř inu semmḥen dayi,
xenni AREBBI d taṣḍart n wuř inu d tasɣart inu i řebda.
27 Maɣar xzar, inni zzayek itteggʷejen, ad fnan.
Kuř ijj wenni xak ittḥeyyaden am i ɣa issefsed ixef nnes,
ad t tkeḥḥeḍed.
28 Necc maca, řdaset i AREBBI d mliḥ i necc.
Necc ggiɣ Sidi inu, SIDI, d amcan inu n tarewřa,
ḥima ad barrḥeɣ marra timegga nnek.