72
1 I Suliman. A AREBBI, ewc i ujeǧid maḥend ad iḥkem ɛlaḥsab řḥeqq nnek,
u ewc tasegda nnek i mmis n ujeǧid.
2 Xenni netta ad iḥakem řgens nnek s tsegda,
řmusakin nnek s řḥeqq.
3 Idurar ad iwyen řehna i řgens,
uřa d tiwririn s tsegda.
4 Netta ad yaɣ i tesɣart n řmusakin n řgens,
ad issenjem tarwa n imezřaḍ,
u ad iřbez wenni ten iḥeṣṣaren.
5 Nitni ad zzayek ggʷeden min ɣa tekk tfuct teǧa,
u taziri ad tesscen udem nnes, zi jjiř ař jjiř. ■
6 Netta ad dd-ihwa x arrbiɛ iwejden i weḥtac,
am tinecnacin issarḍaben tammurt. ■
7 Deg wussan nnes ad innuwar umsegged,
ad din yiři řehna ifeyyḍen ař ɣa tafed taziri war teǧi ɛad.
8 Netta ad iḥkem zi řebḥar ař řebḥar,
zeg iɣzar n Lfuraṭ ař tineggura n temmurt.
9 Imezdaɣ n řexřa ad qqunjeřen zzates,
maca řɛedyan nnes ad řesḥen ucař.
10 Ijeǧiden n Tarcic ad dd-iwyen ict n tewhibt,
ijeǧiden n Caba d Saba ad dd-qarrben tarzefin.
11 Marra ijeǧiden ad as aḍaren,
marra řegnus ad as sexxaren.
12 Maɣar Netta ad ifekk amezřuḍ wenni ɣares ittřaɣan,
uřa d řmeskin d wenni war ɣares amɛawen. ■
13 Netta ad iɛteq amarxu d umezřuḍ,
Netta ad issenjem řeɛmar n imezřaḍ. □
14 Netta ad ifekk řeɛmur nsen zi ddeǧ d lɛunf,
idammen nsen ad sekkwan aṭṭas di tiṭṭawin nnes.
15 Netta ad iddar u ad as immewc wureɣ zi Caba.
U wanita ad iẓẓaǧ řebda di ṭṭweɛ nnes,
ass marra ad t ibarek.
16 Ad yiři ijj n ufeyyeḍ n imendi di temmurt x tqiccat n idurar,
řɣiǧet nnes ad tenhezz am tcejjura n Lubnan,
u inni zi tendint ad nnuwaren am aɣemmuy aziza di temmurt.
17 Isem nnes ad iqqim i řebda,
iři ad innuwar Isem nnes zzat i wudem n tfuct.
Ad dayes ttwabarken nitni,
marra řegnus ad t ssemɣaren.
18 Ad ittwabarek SIDI AREBBI, AREBBI n Israil.
Netta ittegg lmuɛjizat, Netta waha.
19 Ad ittwabarek Isem n uɛuǧi nnes i řebda.
Ad tᵉttwaccur marra tammurt s uɛuǧi nnes. Amin, wah, amin.
20 Tiẓiǧatin n Dawud, mmis n Yassa, aqa kemmřent.