71
1 Necc ttcařeɣ xak, a SIDI, ejj ayi ɛemmarṣ war ttseḍḥiɣ i řebda. ■
2 Fekk ayi s tsegda nnek u arxu ayi.
Arr-dd ɣari amezzuɣ nnek u senjem ayi.
3 Iři d ict n teṣḍart i tzeddiɣt i necc,
ḥima ad ɣares dd-aseɣ řebda.
Cek tweṣṣid ḥima ad ttwasnejmeɣ,
maɣar Cek d jjarf inu d lburj inu.
4 AREBBI inu, senjem ayi zeg ufus n uɛeffan,
zeg ufus n mmis n řmuɛṣiyyet u zi bu-ɣezzu.
5 Maɣar Cek d asitem inu, Sidi inu, SIDI,
Cek d atecři inu zi temẓi inu.
6 Zeg uɛeddis n yemma, tuɣa ayi ɛemmdeɣ xak,
zeg wami dd-ffɣeɣ zeg uɛeddis n yemma,
aqa Cek d amɛawen inu, necc ṣebḥeɣ Cek řebda.
7 I waṭṭas necc am ict n řeɛřamet,
maca Cek d amcan inu ijhed i tarewřa.
8 Ejj aqemmum inu ad iccur s uṣebbeḥ nnek,
ass imun s ccan nnek.
9 War xafi ttmenḍar deg wussan n tewsar inu,
war d ayi semmeḥ mařa jjehd inu iruḥ. □
10 Maɣar řɛedyan inu ssawařen xafi,
inni yarezzun řeɛmar inu, mcawaren jmiɛ.
11 Nitni qqaren: “AREBBI ismeḥ dayes.
Ḍfarem t u menɛem t, maɣar war din bu umsenjem.”
12 A AREBBI, war ttɣimi tiggʷejed xafi,
a AREBBI inu, ewc ayi deɣya afus.
13 Ejj iɣrimen n tudart inu ad ttwaseḍḥan u ad ttwaccen,
ejj inni yarezzun ad ayi ggen řɣar ad ttwadřen s useḥqar d řefḍiḥet. ■
14 Necc maca ad qqimeɣ ttrajiɣ řebda,
u ad arniɣ ɛad ɣar uṣebbeḥ nnek.
15 Aqemmum inu ad ibarreḥ s tsegda nnek,
asenjem nnek, ass imun,
maɣar war ssineɣ řqedd nnes.
16 Necc ad dd-aseɣ s tmegga timeqqranin n Sidi inu, SIDI,
ad idareɣ tasegda nnek, mɣir tenni nnek waha.
17 A AREBBI, Cek tuɣa tesseřmaded ayi zi temẓi inu,
u necc ɣares ař ass-a ttbarrḥeɣ s lmuɛjizat nnek.
18 A AREBBI, war d ayi semmeḥ ca, waxxa wsareɣ cabeɣ,
ař i ɣa ḥajiɣ i jjiř-a x tmegga n ufus nnek uřa x tmegga nnek timeqqranin,
i marra min i dd ɣa yasen.
19 A AREBBI, tasegda nnek tiweḍ ɣares ař sennej qaɛ,
maɣar Cek teggid timegga timeqqranin!
A AREBBI, man wen iǧan am Cek!
20 Aqa Cek tejjid tekka xafi aṭṭas n řeḥṣarat d řɣar,
waxxa amenni Cek ad ayi tesseddared ɛawed,
Cek ad ayi tessuffɣed zeg waman yuǧɣen n temmurt.
21 Cek ad tarrid řemɣaret inu ad temɣar,
ad ayi dd-tennḍed s ufewwej nnek.
22 Ad Cek qadiɣ ɛawed s lharpa, x řaman nnek, a AREBBI.
Ad Cek zehhdeɣ s řgambri, a Amqeddas n Israil.
23 Iyencicen inu ad sřiwřewen, aqa ad zehhdeɣ i Cek,
uřa d řeɛmar inu nni tefdid Cek.
24 Uřa d iřes inu ad iḥaja x tsegda nnek ass marra,
maɣar inni yarezzun ad ayi ggen řɣar, ssnufaren ixef nsen,
iwa, ttwafeḍḥen.