69
1 I umeqqran n imeɣnajen. S teɣnint n ‘Tlillicin’. N Dawud. □ 2 Senjem ayi, a AREBBI, maɣar aman iwḍen ayi ɣar řeɛmar inu.
3 Necc ɣebbiɣ deg ubaryuḍ yuǧeɣ, war din mani i ɣa beddeɣ.
Aqa-yi deg waman yuǧɣen u řḥemřet tᵉttazzeř xafi.
4 Necc uḥřeɣ s iɣuyyan, tmijja inu tebbuybeḥ,
tiṭṭawin inu qḍant zeg uraji x AREBBI inu.
5 Inni d ayi icarrhen x walu ttwesɛen x ucewwaf i iǧan x uzeǧif inu.
Inni yarezzun ad ayi areddǧen, řɛedyan inu i xafi issxarriqen, dewřen jehhden.
Min war ucareɣ, ittxeṣṣa ayi ad tt-i-dd arreɣ ɛad.
6 A AREBBI, Cek tessned tubbuheřya inu,
imerwusa n ddnub inu war xak ffaren.
7 Ejj inni xak issitimen, war ttseḍḥin,
a Sidi inu, SIDI n řɛeskarat,
ejj inni xak yarezzun, war zzayi ttwafeṭṭḥen,
a AREBBI n Israil.
8 Maɣar di ṭṭweɛ nnek i kessiɣ aseḥqar,
aseḍḥi iřeḥḥef i uɣembub inu.
9 Dewřeɣ d aɣrib ɣar aytma,
i iḥenjiren n yemma dewřeɣ d abarrani.
10 Maɣar cḍaret i Taddart nnek tecca ayi,
aseḥqar n yinni Cek isseḥqaran iwḍa-dd xafi. ■
11 Necc ruɣ ɣar uẓummi n řeɛmar inu,
maca aya yiwi ayi-dd ɛřam kuř aseḥqar.
12 Necc yarḍeɣ ict n txancet n wecḍan,
maca dewřeɣ asen d ijj n lmatal.
13 Inni iqqimen ɣar tewwart n tendint ssawařen xafi,
uřa d izřan n yinni issessen ccrab.
14 Necc maca ttᵉttarɣ ɣarek, a SIDI!
Aqa din ijj n řweqt n uḥinni, a AREBBI,
s řemɣaret n tmexsiwt nnek icewwaren.
Arr-dd xafi s usenjem nnek i dd-iffɣen zi řmanet nnek.
15 Jbed ayi-dd zeg ubaryuḍ u ejj ayi war ttɣebbiɣ,
ḥima ad ttwafekkeɣ zeg inni d ayi icarrhen u zeg waman yuǧɣen.
16 War ttejji ad ayi tawi řḥemřet,
war ttejji řaǧaɣ ad ayi isarḍ,
uca anu ad xafi ibelleɛ aqemmum nnes.
17 Arr ayi-dd, a SIDI, maɣar tamexsiwt nnek icewwaren teṣbeḥ.
Qřeb ɣari ɛlaḥṣab arreḥmet nnek ifeyyḍen.
18 War tteffar ca udem nnek x umsexxar nnek,
maɣar ttwaḥṣareɣ.
Arr ayi-dd daweḥda.
19 Ades ayi-dd ɣar řeɛmar inu, fekk i-t.
Fdi ayi di ssibbet n řɛedyan inu.
20 Cek tessned řɛar inu d useḍḥi inu d řefḍiḥet inu,
aqa marra inni d ayi iḥeṣṣaren bedden zzatek.
21 Aseḥqar yarẓ ayi uř u necc qenḍeɣ aṭṭas.
Necc rajiɣ aziǧez, maca walu, u rajiɣ inni d ayi ɣa iɛezzan,
maca war ufiɣ uřa d ijjen.
22 Nitni ggin ssem di macca inu,
u i ufadi inu ggin ayi ad sweɣ řxeǧ. ■
23 Ejj ṭṭabřa nsen ad tedweř d řfex,
uřa d taxceft i yenni akidsen ibedden. ■
24 Sdarɣeř tiṭṭawin nsen ḥima war ttwiřin ɛad,
arr tijɛinnatin nsen ad ttenhezzant řebda.■
25 Zeǧeɛ xasen asxeḍ nnek,
ejj řḥaduq n weɣḍab nnek ad ten iřqef.
26 Ejj řmargeḥ n tzeddiɣt nsen ad idweř d řxarbet,
maḥend war dayes izeddeɣ ɛad uřa d ijjen. ■
27 Maɣar nitni darracen x weryaz nni tuɣa tewtid Cek,
u s řhard nsen arnin i řeḥriq n yinni zzayek ittwařeqqfen.
28 Arr ddenb x ddenb nsen,
war ten ttejji ad dd-adfen ɣar tsegda nnek.
29 Ejj i-ten ad ttwamḥan zeg Wedlis n Tudart,
u war ttwazemmemen ca ɣar imseggaden.
30 Maca necc aqa ayi di řeɣben u qenḍeɣ.
Iři asenjem nnek, a AREBBI, ad ayi issgeɛɛed sennej.
31 Necc ad ṣebbḥeɣ Isem n AREBBI s yijj n yezři,
s uqadi ad as ssemɣareɣ.
32 Aya ad yarḍa SIDI ktar zeg ijj n ufunas,
zeg ijj n uyenduz s waccawen d tecḍect immsebḍan.
33 Imhinen inni tt iẓrin, ad farḥen,
u inni yarezzun x AREBBI,
aqa uř nwem ad iddar.
34 Maɣar SIDI ittesřa ɣar imezřaḍ,
war isseḥqiri ca imeḥbas nnes.
35 Ejj ijenwan d temmurt ad t ssemɣaren,
řebḥur d marra min daysen ittenhezzan.
36 Maɣar AREBBI ad issenjem Ṣihyun,
ad ibna ɛawed tineddam n Yahuda,
u nitni ad din zedɣen u ad tt ṭṭfen d řwart.
37 Zzariɛet n imsexxaren nnes ad tt tᵉṭṭef d tasɣart,
inni ittexsen Isem nnes ad dayes zedɣen.