68
1 I umeqqran n imeɣnajen. N Dawud. Azehhed. Izři. 2 AREBBI ad ikkar, řɛedyan nnes ad ttwareyycen,
inni t icarrhen ad arewřen zzat i wudem nnes. ■
3 Cek ad ten tessiggʷejed am ddexxan iṭṭaw,
am ccmeɛ ifessi di tmessi,
ammu i ɣa fnan iɛeffanen zzat i wudem n AREBBI.
4 Maca imseggaden ad farḥen,
ad sřiwřiwen s řefraḥet zzat i wudem n AREBBI,
u ad ɣebban řefraḥet.
5 Ɣennjem i AREBBI, zehhdem i Yisem nnes,
ggem ijj n webrid yuɛřan i wenni ineddhen di řewḍa.
SIDi d Isem nnes.
Negzem s řefraḥet zzat i wudem nnes.
6 Babatsen n iyujiřen d Řqaḍi n tijjař,
ammu i yeǧa AREBBI di Tzeddiɣt nnes iqeddsen, □
7 ammu i yeǧa AREBBI wenni issezdɣen inni weḥḥedsen
deg ict n twacunt,
wenni issuffuɣen imeḥbas s ufřaḥ,
maca imɣewwaɣen ad zedɣen
deg ict n temmurt ittwascemḍen zi tfuct.
8 A AREBBI, ařami tizzared zzat i wudem n řgens nnek,
ařami tuɣa teggured di tnezruft, - silah - ,
9 tenhezz temmurt uca ucruren ijenwan, zzat i wudem n AREBBI,
uřa d adrar n Sina inhezz zzat i wudem n AREBBI, AREBBI n Israil. □ ■
10 Ak-d wenẓar ifsusen, trucced tammurt, aya, AREBBI,
xmi i ɣa isřaw řwart nnek, tewcid as Cek ɛawed jjehd.
11 Taḥimart nnek tuɣa tzeddeɣ dayes.
S tcuni nnek tesswejded tt i řmeskin, aya, AREBBI! □
12 Sidi inu iwca awař.
Timɣarin nni dd-ittawyen řexbar aṣebḥan ttkewwnent ijj n ubarru ameqqran n treqqasin.
13 Ijeǧiden n řɛeskarat ttrakkwařen, aqa ttrakkwařen,
u tenni iqqimen di taddart, tbeṭṭa takeccaḍt. □
14 Xenni ad tbuzzřem jar tnayen n ifrayen,
am wedbir s wafriwen ttwařeḥḥfen s nnuqart,
u arric nnes s wureɣ aziza ittissiqen.
15 Řami Amzemmar x kuřci issareyyec ijeǧiden di temmurt,
iccat wedfeř x Ṣalmun. □
16 Adrar n AREBBI, adrar n Bacan.
Adrar n Bacan d ijj n wedrar s tqiccitin aṭṭas. □
Idurar d teɣzurin n Israil (Izhd. 68:16)
17 Mayemmi txezzarem ammu s wasam,
kenniw a idurar s marra tiqiccitin nwem,
ɣar wedrar i imeẓri i-t AREBBI d tazeddiɣt i yixef nnes?
Wah, nican SIDI ad din izdeɣ i řebda. ■
18 Ikarruten n AREBBI aqa aten d ɛecrayat n řuřuf d ɛecrayat n řuřuf,
uřa d ařef u ɛawed ařef.
Sidi inu aqa-t jar asen, adrar n Sina aqa ittwařeḥḥef s tqeddast. ■
19 Cek tuřyed ɣar sennej, tnedhed di tmeḥbast,
Cek tmenɛed tarzifin zeg iwdan, iwa ɛad zeg imɣewwɣen,
ḥima SIDi, AREBBI, ad izdeɣ dinni. ■
20 Ad ittwabarek Sidi inu. Ass x wass yarebbu i neccin ddquřat.
Arebbi nni d asenjem nneɣ. Silah. □
21 Arebbi nni d ijj n Arebbi n isenjamen i neccin,
aqa din ifekkiten zi řmewt ɣar SIDI, Sidi inu.
22 S tidett, AREBBI, ad iřbez azeǧif n řɛedyan nnes,
aceqquf s ucewwaf n wenni iqqimen ittenneḍ s imerwusa n ddnub nnes.
23 Sidi inu inna: “Necc ad kenniw dd-arreɣ zi Bacan,
ad kenniw dd-arreɣ zi řaǧaɣ n řebḥar, ■
24 ḥima ad tḥarrced s uḍar nnek deg idammen,
uca uřa d iřes n yiṭan nnek ad iṭṭef tasɣart nnes zi řɛedyan.”
25 Nitni ẓrin ibriden nnek mammec ten tuyured, a AREBBI,
ibriden n Arebbi inu, ajeǧid inu iřeḥḥfen di tqeddast.
26 Imeɣnajen tuɣa gguren ɣar zzat, inni iccaten x ifiřan ɣar ḍeffar,
tiɛzariyyin tinni ittiraren x ibendiřen nsent di řwest.
27 Barkem AREBBI di tmesmunin, a SIDI,
zi řɛunṣar n Israil.
28 Aqa din Binyamin ameẓyan, wenni xasen ittṣeǧaḍen,
xenni řḥukkam n Yahuda ak-d ubarru n iɛciren nsen,
uřa d řḥukkam n Zabulun d řḥukkam n Naftali.
29 AREBBI nnek iweṣṣa maḥend ad tᵉttwasjehded,
a, AREBBI, sejhed min teggid di ṭṭweɛ nneɣ,
30 zi Zzawect nnek Tameqqrant, sennej i Urcalim.
Ijeǧiden ad ac iwyen tarzifin. ■
31 Siggʷed řweḥc nni jar uɣanim,
abarru n ifunasen ijehden ak-d iyenduzen n řegnus,
ařami ittwařbez, uca ad idweř nnuqart iddez.
Netta izeǧeɛ řegnus nni tuɣa ttmeẓren deg umenɣi. □
32 Ad dd-asen imcennɛen zi Miṣra,
Kuc ad isswiẓẓeḍ ifassen nnes ɣar AREBBI s tezřa.
33 A tigeldiwin n temmurt ɣennjent i AREBBI,
zehhdent i Sidi inu. Silah.
34 Netta d wenni ineddhen deg ujenna x marra ijenwan zeg wecḥař uya.
Xzar, aqa Netta igga ijj n řḥess ijehden s tmijja nnes.
35 Wcem jjehd i AREBBI!
Lɛaḍama nnes aqa-tt tiwa i Israil u jjehd nnes aqa-t deg iseynuten.
36 A, AREBBI, mammec tessiggʷeded zi Tizawiyyin nnek Iqeddsen,
a AREBBI n Israil, Cek d wenni itticen jjehd d tzemmar i řgens.
Ad ittwabarek AREBBI.