1 I umeqqran n imeɣnajen. Sadu ufus n Yadutun. N Dawud.

2 Řeɛmar inu yaressa, ittraja AREBBI waha,

aqa zzayes dd-ittas usenjem inu.

3 Aqa-tt d Taṣḍart inu d usenjem inu,

lburj inu yuɛřan, war ttefriɣeɣ aṭṭas.

4 Mecḥař ɛad i ɣa tekkem thejjmem x weryaz,

Ma aqa teřham tɣeṭṭřem t,

am ijj n řḥiḍ iweṭṭa, am ijj n weɣbar ittwaɣḍeř.

5 Nitni ttemcawaren waha ḥima ad t-i-dd ɣeḍřen zeg wemcan nnes yuɛřan.

Nitni areṭṭan s ixarriqen.

Ttbarken s uqemmum nsen,

maca deg wuř nsen neɛɛřen. Silah. ^□  

6 Raja i AREBBI waha, a řeɛmar inu,

minzi zzayes řayas inu.

7 Aqa-tt d Taṣḍart inu d usenjem inu,

lburj inu yuɛřan, war ttefriɣeɣ ca.

8 Asenjem inu d uɛuǧi inu aqa aten di AREBBI,

Netta d Taṣḍart inu ijehden, amcan inu n tarewřa aqa-t di AREBBI.

9 Tiqqem řebda dayes, a řgens!

Zeǧɛem uř nwem zzat i wudem nnes.

AREBBI d amcan nneɣ n tarewřa. Silah.

10 Tarwa n Adam aqa aten baṭeř,

tarwa n weryaz aqa daysen řɣecc.

Ad geɛɛden di řmizan s tnayen n ṭṭawyat,

aqa aten jmiɛ ffɣen-dd zi řbaṭeř.

11 War ttecřem x ddeǧ,

war ttuffem ak-d tukkarḍa.

Mařa agřa imeqqar,

war xas ssrusam uř nwem.

12 AREBBI issiweř ict n twařa, necc sřiɣ tt tnayen n twařawin,

aqa: “Jjehd zi AREBBI”.

13 Tamexsiwt icewwaren i Cek, a Sidi inu!

Minzi Cek ad txeǧṣed kuř ijj ɛlaḥsab min igga. ^■