1 I umeqqran n imeɣnajen. Ak-d uzenzun. N Dawud.

2 A AREBBI, seř i uřaɣi inu,

ewc taynit i tẓaǧit inu.

3 Zi ṭṭarf aneggar n temmurt ttřaɣiɣ xak,

xmi ittefciř wuř inu.

Ndeh ayi x ijj n jjarf yuɛřan xafi.

4 Maɣar tuɣa Cek d amcan n tarewřa i necc,

d lburj ijehden ḍidd i řeɛdu.

5 Necc ad qqimeɣ deg Uqiḍun nnek i řebda,

ad ddurryeɣ sadu wafriwen nnek. Silah.

6 Maɣar Cek, a AREBBI, tesřid ɣar lwuɛud inu.

Cek tewcid ayi tasɣart n yinni itteggʷeden Isem nnek.

7 Ad tarnid ɛad ussan x wussan n ujeǧid,

ařami iseggʷusa nnes ad iřin zi jjiř ař jjiř.

8 Netta ad iqqim zzat i wudem n AREBBI i řebda.

Ad xas teḥḍa tamexsiwt icewwaren d řaman.

9 Ammu i ɣa zehhdeɣ i Yisem nnek i řebda,

ḥima ad kemmřeɣ lwuɛud inu, ass awarni umas.