1 I umeqqran n imeɣnajen. S teɣnint n ‘Talillect d acehhad’.

Tira ineqcen n Dawud i useřmed. ^□  

2 Awarni řami tuɣa ittmmenɣa ak-d Iramiyyen zi Misubutamya,

u ak-d Iramiyyen zi Ṣuba, idweř-dd Yuwab

uca iwta ayt n Idum di teɣzurt n Tmeǧaḥt, ɛecra ařaf n yeryazen. ^■  

3 A AREBBI, Cek tenḍareḍ aneɣ, tarẓid aneɣ.

Tuɣa tesɛared aṭṭas! Sbedd aneɣ ɛawed! ^■  

4 Cek tessenhezzed tammurt, tfeǧqed tt.

Sgenfa tireẓẓa nnes, maɣar aqa ttenhezza.

5 Cek tessecned ixef nnek i řgens nnek s řeqsaḥet.

Cek tewcid aneɣ ad nsu ccrab issdewwaxen.

6 Inni Cek itteggʷeden, teggid asen taɛeǧant

i ɣar ttrakkwařen zi fřitcat n řqews. Silah.

7 Ḥima imɛizzen nnek ad ttwafekken,

awi asenjem s ufus afusi nnek u arr-dd xaneɣ. ^■  

8 AREBBI tuɣa issawař di Zzawect nnes Iqeddsen,

s uyenni ad negzeɣ s řefraḥet.

Necc ad bḍiɣ Cakim u ad ɛebbareɣ taɣzurt n Sukkut.

9 Jilɛad inu, Manassa inu,

Ifrayim d aseřqi ijehden n uzeǧif inu,

Yahuda d amgewwed inu.

10 Mu’ab d ssarij inu i usird,

x Idum ad nḍareɣ tisiřa inu,

necc ad dduqzeɣ s usřiwřew x temmurt n Filicit.

11 Wi d ayi i ɣa inedhen di tendint ifaryen?

Wi d ayi ɣa igewwden ɣar Idum?

12 Ma war d aneɣ tenḍared, aya, AREBBI,

u ak-d řɛeskarat nneɣ ma war akidsen dd-teffiɣed ɛad, a AREBBI?

13 Ewc aneɣ afus ḥima ad aneɣ tessnejmed zi řeḥṣaret,

maɣar asenjem s ufus n yijj n bnadem aqa-t baṭeř.

14 Ak-d AREBBI ad negg s wemḥad,

Netta ad iɛfes x yenni d aneɣ iḥeṣṣaren.