59
1 I umeqqran n imeɣnajen. ‘War t ttareddeǧ!’ N Dawud. Tira ineqcen.
Umi Cawul ijja ad ḥḍan taddart n Dawud ḥima ad t nɣen. ■
2 Fekk ayi zi řɛedyan inu, a AREBBI,
sgeɛɛed ayi sennej ɣar uḥeṭṭu zeg inni xafi ittekkaren.
3 Fekk ayi zeg inni itteggen řɣecc,
senjem ayi zeg iryazen n idammen.
4 Aqa, xzar, nitni ggin ict n texceft i řeɛmar inu,
nitni munen xafi.
War din axeṭṭu uřa d ddenb ɣari, a SIDI!
5 Waxxa war ggiɣ ljarima,
aqa nitni zeɛma usin-dd ttazzřen-dd ɣari u sswejjaden ixef nsen.
Faq, as-dd ɣar umsagar akidi u xzar.
6 Cek, a SIDI, AREBBI n řɛeskarat, AREBBI n Israil,
faq ḥima ad třeqfed marra řegnus.
War ttḥinni x uřa d ijj zi marra iɣeddaren inni itteggen řɣecc. Silah.
7 Aqa ttɛeqben ɣar tmeddit,
ttzun amecnaw aqzin,
u ttennḍen i tendint.
8 Xzar, s uqemmum nsen ssusufen qaɛ,
řesyuf nsen aqa aten x iyencicen nsen,
minzi man wen i ɣa isřen? ■
9 Cek maca, a SIDI, ad xasen tḍeḥced,
Cek ad tḥecced x marra řegnus. ■
10 A jjehd nnes, necc ad t rajiɣ,
maɣar AREBBI d lburj inu yuɛřan.
11 Tamexsiwt icewwaren n AREBBI inu ad ayi tizwar,
AREBBI ad ayi yarr ad ẓareɣ inni d ayi iḥeṣṣaren.
12 War ten neqq ca, maḥend řgens inu war t ittettu.
Ejj i-ten ad weddaren zi tzemmar nnek
menḍar i-ten swadday, maɣar Cek d taseddart nneɣ i useřqi, a Sidi inu.
13 X ddnub n uqemmum nsen,
x wawařen i dd-itteffɣen zeg iyencicen nsen,
x uya ejj i-ten ad ttwaḥebbsen di nnfaxet nsen,
uřa x nneɛřet u x uxarriq nni xef ttḥarden.
14 Keḥḥeḍ i-ten deg wesɛar nnek,
keḥḥeḍ i-ten ařami war ǧin ɛad,
u arr i-ten ad ssnen, aqa AREBBI d řḥakem di Yaɛqub,
ɣares ař tineggura n temmurt. Silah.
15 Aqa ad ɛeqben ɣar tmeddit,
ttzun amecnaw aqzin,
u ttennḍen i tendint.
16 Ejj i-ten ttemhafan da d diha x macca,
ejj i-ten xenni ad din ssensen barra, mařa war jjiwnen,
17 Necc ad ɣennjeɣ x jjhed nnek,
ɣar teffut ad sřiweřweɣ x tmexsiwt nnek icewwaren,
maɣar tuɣa Cek d ijj n lburj yuɛřan i necc,
d amcan n tarewřa deg wass n řeḥṣaret inu.
18 Jjehd inu, necc ad xak zehhdeɣ,
maɣar Cek AREBBI d lburj yuɛřan inu,
AREBBI n tmexsiwt inu icewwaren.