1 I umeqqran n imeɣnajen. ‘War t ttareddeǧ!’ N Dawud.

Tira ineqcen.

2 Ma tessawařem s tidett tasegda deg useɣdi?

Ma tḥekkmem tarwa n bnadem s řḥeqq?

3 Lla, maca deg wuř nwem tᵉtteggem řɣecc,

x temmurt twezznem lɛunf n ifassen nwem.

4 Zeg wami ǧan di řemřawet ffɣen iɛeffanen zeg webrid,

zeg uɛeddis n yemmatsen weddaren ayt n bu-ixarriqen.

5 Aqa daysen ssem am semm n ufiɣar.

Nitni amecnaw ict n třefsa tadehcurt tenni iqqnen amezzuɣ nnes, ^■  

6 tenni war ittesřin ɣar tmijja n iɛezzamen,

uřa ɣar tmijja n useḥḥar nni ittḥakan aṭṭas di tseḥḥart.

7 A AREBBI, arẓ asen tiɣmas deg uqemmum nsen,

arẓ tiɣmas n teɣmart n iyraden imeẓyanen, a SIDI!

8 Ejj i-ten ad fesyen, ařami ad ffɣen am waman.

Mařa imeḥḥeḍ řqews s fřitcat nnes, ejj i-ten war qḍiɛen.

9 Ejj i-t ad ifna am ubucceř irizzen.

Ejj i-ten war ẓarren tfuct, amecnaw weṭṭu n uɛeddis n tmeṭṭut. ^□  

10 Qbeř i ɣa acant marmitat nwem ak-d řeḥmu n cbarq ak-d isennanen,

ad dayes iṣuḍ ařami ad yaẓẓeř x weysum d aziza niɣ x weysum itteḥduduqen.

11 Amsegged ad ifarḥ xmi i ɣa iẓar antaqem.

Netta ad issird iḍaren nnes deg idammen n iɛeffanen.

12 Ad yini bnadem: “Xenni aqa din řɣiǧet i umsegged,

aqa din ijj n AREBBI nni iḥekkmen di temmurt.”