1 Azehhed n Dawud, ařami t tuɣa di řexřa n Yahuda. ^■  

2 A AREBBI, Cek d Arebbi inu! Ɣar tuffut arezzuɣ xak,

řeɛmar inu ittfada-dd ɣarek, aysum inu ittmeẓri dayek,

deg ict n temmurt yuẓɣen ittfadan břa aman. ^□  

3 Ammu i dayek xezzareɣ di Zzawect Iqeddsen,

ḥima ad ẓareɣ jjehd nnek d uɛuǧi nnek.

4 Maɣar tamexsiwt nnek icewwaren teḥřa x tudart,

s uyenni ad Cek ṣebbḥen iyencicen inu.

5 Ammu i d ac ɣa barkeɣ di tudart inu,

ad ssgeɛɛdeɣ ifassen inu deg Yisem nnek.

6 Řeɛmar inu ad ijjiwen amecnaw tyawant zi trussi d tadunt,

s iyencicen isřiwřewen ad Cek iṣebbeḥ uqemmum inu,

7 mařa ttxarrṣeɣ dayek di tassut,

ttxemmameɣ dayek ɣar uḍufen n wecbar n ǧiřet.

8 Minzi tuɣa Cek d amɛawen inu,

di tiři n wafriwen nnek ad sřiwřeweɣ.

9 Řeɛmař inu iřeṣṣeq dayek awarni ac,

afus nnek afusi ittᵉṭṭef dayi.

10 Inni ittexsen ad areddǧen řeɛmar inu,

ad iwḍen ɣar imucan yuǧɣen qaɛ sadu temmurt.

11 Nitni ad ttwasellmen i tzemmar n ssif,

ad dewřen d takeccaḍt i iceɛbawen.

12 Maca ajeǧid ad ifarḥ zi AREBBI.

Kuř ijj zeg inni i ɣares i ɣa ittjaǧan ad ifeyyec,

minzi aqemmum n yinni issawařen s ixarriqen ad ittwabelleɛ.