1 I umeqqran n imeɣnajen. S teɣnint n ‘Ict n tedbirt ibekkmem deg imucan iggʷejen’. N Dawud. Tira ineqcen. Řami t ṭṭfen Ifilisṭiniyyen di Jat. ^■  

2 Ḥinn xafi, a AREBBI, maɣar ijj n bnadem yarezzu ad ayi iṣarḍ,

iḥeṣṣar ayi ijj n umjahed ass marra.

3 Inni d ayi iḥeṣṣaren xsen ad ayi ṣarḍen ass marra,

maɣar inni kidi ittmenɣan aqa aten deg waṭṭas, a Amɛuǧi x kuřci!

4 Deg wass i di i ɣa ggʷedeɣ,

ad xak ttecřeɣ.

5 X AREBBI, wenni umi ɣa ṣebḥeɣ awař nnes,

x AREBBI i ttecřeɣ, war tteggʷideɣ ca,

maɣar min zemmaren ad ayi ggen midden? ^□  

6 Nitni qeǧben awařen inu ass ikmeř,

marra tnawi nsen aqa aten xafi d řɣar.

7 Nitni munen, nuffaren,

nitni ḥeṭṭan inarziwen inu,

xmi arezzun ad nɣen řeɛmar inu.

8 Ma zemmaren ad arewřen waxxa ggin řɣecc?

Sehwa řegnus deg weɣḍab nnek, a AREBBI!

9 Cek tḥessbed ussan n weṭlaɛ inu.

Egg imeṭṭawen inu di tzeyyat n waman nnek,

ma war ǧint deg wedlis nnek?

10 Xenni ad dewřen řɛedyan inu ɣar ḍeffar,

deg wass umi ɣa řaɣiɣ.

Necc ssneɣ aya: AREBBI aqa-t akidi.

11 X AREBBI, wenni umi ɣa ssemɣareɣ awař nnes,

x SIDI, wenni umi ɣa ssemɣareɣ awař nnes,

12 x AREBBI i xef ttecřeɣ, war tteggʷideɣ ca,

maɣar min izemmar bnadem ad ayi yegg? ^■  

13 Xafi, a AREBBI, arsin lwuɛud i Cek ittwaggen.

Ad ten kemmřeɣ i Cek s uqadi.

14 Maɣar Cek tessnejmed řeɛmar inu zi řmewt,

u ma war teḥḍid uřa d iḍaren inu zeg uneqraḍ,

ḥima ad uyureɣ zzat i wudem n AREBBI di tfawt n yinni iddaren?