55
1 I umeqqran n imeɣnajen. Ak-d uzenzun. Axemmi n Dawud.
2 A AREBBI, seř i tẓaǧit inu,
war ssnuffara ca ixef nnek zzat i uzaweg inu.
3 Ḥḍa ayi u arr-dd xafi.
Necc ttraḥeɣ ttaseɣ-dd ɣar zzat d ḍeffar am ttcetciɣ u ssɣunfiɣ.
4 Zi ssibbet n řḥess n řeɛdu, zeg uhuddi n iɛeffanen,
maɣar nitni hejmen-dd xafi s řmuɛṣiyyet
u ḍeffaren ayi s uxeyyeq.
5 Uř inu itteqqes ayi daxeř,
inexřiɛen n řmewt wḍan-dd xafi.
6 Tiggʷudi d tarjijit ṭṭfent ayi,
uřa d arjef iḥṣar ayi.
7 Necc nniɣ: “Mři d ayi wcin afriwen am tedbirt,
xenni iři ḍwiɣ, ad zedɣeɣ di ca n wemcan.”
8 Xzar, ad arewřeɣ ɣar řaggʷaj qaɛ,
ad ssenseɣ di řexřa. Silah.
9 Ad deɣyeɣ ḥima ad ttwafekkeɣ zeg usemmiḍ, zi tḥaryaḍt.
10 Ṣarḍ i-ten, a Sidi inu, sebḍa iřes nsen,
minzi ttwařiɣ lɛunf d umenɣi di tendint.
11 Ass d ǧiřet gguren deg wenneḍ nnes x řeḥyuḍ,
u ɣar daxeř nnes aqa din řeɣben d tamara.
12 Řɣar aqa-t daxeř nnes,
azzay nnes war zzayes ittḥeyyid ca ddeǧ d wecmat.
13 Maɣar war iǧi d řeɛdu wenni d ayi isseḥqaran,
minzi aya zemmareɣ ad t ksiɣ.
War iǧi uřa d wenni d ayi icarrhen d wenni issemɣaren ixef nnes s wawař xafi,
minzi zzayes zemmareɣ ad nnuffareɣ!
14 Maca aqa d cek, a bnadem, cek d aqrin inu,
ameddukkeř inu d umqarreb inu!
15 Neccin, inni igguren ak-d wayawya di ttiqqet,
neggur ɣar Taddart n AREBBI deg uhimur.
16 Ad xasen tewḍa řmewt ařami dd-hwan am ddaren di řaxart,
maɣar aqa din řɣar di tudrin nsen, deg wuřawen nsen. □
17 Necc, wah necc ad řaɣiɣ x AREBBI,
SIDI ad ayi issenjem.
18 Ɣar tmeddit u ɣar tuffut u s uziř ad cetciɣ, ad ssɣunfeɣ,
u Netta ad iseř i tmijja inu.
19 Netta ifdi řeɛmar inu di řehna zeg inni xafi ihejmen,
minzi tuɣa aten deg waṭṭas ḍidd inu. □
20 Arebbi ad iseř, ad ten dd-issehwa.
Netta ittɣima zeg wecḥař uya. Silah.
Aqa nitni war ttbeddiřen,
war tteggʷeden ca AREBBI.
21 Netta ineṭṭar afus deg inni ak-d wi igga řehna,
netta issaruṣṣuḍ řɛahd nnes.
22 Aqemmum nnes yarḍeb ḥsen zi trussi,
maca deg wuř nnes itturja amenɣi.
Awařen nnes d iřeqqaɣen x zzect,
maca aqa aten am řesyuf ttwajebden.
23 Nḍar amnus nnek x SIDI u Netta ad dayek itthilla.
Ɛemmarṣ war ittejji amsegged ad ifarɣ.
24 Cek maca, a AREBBI, ad ten tessehwid deg wanu n uhellek.
Iryazen n idammen d řɣecc war ttkemmřen azyen n wussan nsen.
Maca necc ttecřeɣ xak.