1 I umeqqran n imeɣnajen. Axemmi n Dawud.

2 Řami dd-yusa Duwaɛ, zi Idum,

ixebbar Cawul, inna as:

“Aqa Dawud yusa-dd ɣar taddart n Aximalik.” ^■  

3 Mammec tfeyyced zi tɛeffant, a jjiheř?

Tamexsiwt icewwaren n AREBBI tᵉttekk ass imun.

4 Iřes nnek ittxarreṣ di řɣar,

amecnaw ijj n řmus iqeḍɛen i uḥeffi issuffuɣ acmat.

5 Cek ttexsed taɛeffant aṭṭas x tṣebḥant,

řhard s ixarriqen ktar aṭṭas x řhard n tsegda. Silah.

6 Cek tᵉttexsed awařen ihellken,

uřa d iřes iccur s wecmat.

7 Maca Arebbi ad cek yareddeǧ i řebda,

Netta ad cek iṭṭef, ad cek ikkes zi tzeddiɣt.

Netta ad cek iqřeɛ zeg iẓewran nnek zi temmurt n yinni iddaren. Silah.

8 Imseggaden ad t ẓaren ad ggʷeden.

Ad xas ḍeḥcen, ad inin:

9 “Xzar aryaz ijehden wenni umi war iggi AREBBI jjehd nnes,

maca tuɣa ittceř x wagřa nnes ameqqran.

Tuɣa idweř ijhed s řɣar nnes.”

10 Necc ad iřiɣ amecnaw ict n tzitunt tazeyzawt di Taddart n AREBBI.

Necc ttiqqeɣ di tmexsiwt icewwaren n AREBBI i řebda qaɛ.

11 Necc ad Cek qadiɣ i řebda qaɛ,

maɣar Cek teggid t.

Ad ssitimeɣ deg Yisem nnek,

maɣar Netta d aṣebḥan i imtiqqan nnek.