1 I umeqqran n imeɣnajen. Azehhed n Dawud.

2 Ařami i ɣares dd-yusa unabi Natan,

awarni řami yudef Dawud x Batcabaɛa. ^□  ■  

3 Ḥinn xafi, a AREBBI, ɛlaḥsab tamexsiwt nnek icewwaren.

Mseḥ ixeṭṭan inu ɛlaḥsab afeyyeḍ n arreḥmet nnek.

4 Ssird řmuɛṣiyyet inu zzayi marra,

sizdeg ayi zi ddenb inu,

5 maɣar necc ssneɣ ixeṭṭan inu,

ddenb inu řebda ibedd ayi-dd ɣar tiṭṭawin. ^□  

6 Akidek waha i xḍiɣ,

ggiɣ min iǧan d aɛeffan jar tiṭṭawin nnek,

ařami Cek tseggded deg wawařen nnek,

teṣfid di řeḥkamat nnek.

7 Xzar, ttwaxeřqeɣ-dd di ddnub,

di ddnub teksi ayi yemma.

8 Xzar, Cek tᵉttexsed tidett di daxeř,

di tnuffra tesscaned ayi tiɣit.

9 Ksi xafi ddnub s tɛelǧet, xenni ad dewřeɣ qqureɣ,

sird ayi, xenni ad dewřeɣ d acemřař x wedfeř. ^■  

10 Arr ayi ad sřeɣ arcuq d řefraḥet,

ḥima ixsan nni i třebzed Cek,

ad arjijen zi řefraḥet.

11 Snuffar ddnub inu zzat i wudem nnek,

mseḥ i marra řmuɛṣiyyet inu.

12 Xřeq-dd dayi uř izdig, a AREBBI,

jedded di daxeř inu ijj n arruḥ imetnen.

13 War d ayi neṭṭar zeg wudem nnek,

war zzayi ttekkes Arruḥ Iqeddsen nnek.

14 Ewc ayi ɛawed řefraḥet n usenjem nnek,

uřa d ijj n buḥbeř iqedden i kidi ɣa ibedden.

15 Xenni ad ssɣareɣ ibriden nnek i yenni xak iɛeddan,

u ggur ad ɣarek dd-ɛeqben imednab.

16 Senjem ayi zeg umarwas n idammen, a AREBBI, AREBBI n usenjem inu,

xenni ad isřewřiw iřes inu x tsegda nnek.

17 Arzem ayi iyencicen inu, a Sidi inu,

xenni ad ibarreḥ uqemmum inu s ccan nnek,

18 maɣar war d ak tecqi tɣarṣt, iři wciɣ ac tt,

taɣarṣt n wecmaḍ war d ac dd-tᵉttis x řxaḍar.

19 Tiɣarṣa n AREBBI aqa atent d ijj n buḥbeř yareẓ,

ijj n wuř iddez war t tesseḥqarid, a AREBBI!

20 Egg řxar i Ṣihyun ɛlaḥsab arḍa nnek,

bna řeḥyuḍ n Urcalim!

21 Xenni ad tarḍid di tɣarṣa n řmuɛṣiyyet,

di tɣarṣt n wecmaḍ ikemmřen.

Xenni ad qeddmen iyenduzen x uɛalṭar nnek, x řmedbeḥ nnek n wecmaḍ.