1 Ijj n uzehhed n Asaf. Arebbi x marra irebbiten, SIDI issawař.

Netta ittřaɣa i temmurt zi mani dd-tenqar tfuct ɣares ař mani teɣři.

2 Zi Ṣihyun, aẓri ikemmřen,

ittban AREBBI ittissiq.

3 AREBBI nneɣ ad dd-yas, war isseɣd ca.

Timessi zzates ad tecc,

taḥaryaḍt i d as dd-ittennḍen ad tṣuḍ aṭṭas.

4 Netta ad iřaɣa i ijenwan sennej,

u i temmurt ḥima ad iḥkem x řgens nnes:

5 “Smunem-dd ɣari imtiqqan inu,

inni kidi itteggen řɛahd s tɣarṣt.”

6 Ijenwan ttbarrḥen tasegda nnes,

maɣar AREBBI simant nnes aqa-t d řqaḍi. Silah. ^□  

7 “Seř, a řgens inu, u Necc ad ssiwřeɣ, Israil,

Necc ad cehdeɣ ḍidd nnek: Aqa Necc, AREBBI, d AREBBI nnek!

8 War iǧi x tɣarṣa nnek ad cek webbxeɣ,

maɣar tiɣarṣa nnek aqa atent řebda zzati.

9 War kessiɣ ca ayenduz zi taddart nnek,

uřa d iɣayḍen zi teqwirin nnek.

10 Maɣar marra imuddar n wezɣar aqa inu,

řmař x wařef idurar. ^□  

11 Necc ssneɣ marra ijḍaḍ n idurar,

mummu n yeyyar, aqa-t Inu.

12 Mři tuɣa dayi řaẓ, ma war d ac t qqareɣ,

maɣar inu ddunect d uɛemmar nnes. ^■  

13 Ma ad cceɣ xenni aysum n ifunasen,

niɣ idammen n iɣayḍen?

14 Awi-dd i AREBBI taɣarṣt n uqadi,

u kemmeř lwuɛud nnek i Umɛuǧi x kuřci. ^■  

15 Řaɣa ayi-dd deg wass n řeḥṣaret,

xenni ad cek ssnejmeɣ uca cek ad ayi tegged ccan.”

16 Maca i uɛeffan iqqar AREBBI:

“Mayemmi tbarrḥed tiweṣṣa inu,

u teggid Řɛahd inu deg uqemmum nnek,

17 umi tcarrhed ttarbiyyet inu,

u tenḍared awařen inu awarni ac.

18 Mařa teẓriḍ ijj n uxewwan, ammu i teggured akides,

u tᵉttṣurid ak-d yenni izennan.

19 Aqemmum nnek tᵉttarrid i-t i řɣar,

iřes nnek ittxarreṣ deg wecmat.

20 Tettɣimid dinni tessawařed x umac,

tessefdaḥeḍ zi mmis n yemmas.

21 Aya tᵉttegged u Necc sseɣdiɣ.

Ttɣiř ac, aqa ayi am cek.

Necc ad cek webbxeɣ u ad ssarseɣ ddnub nnek zzat i tiṭṭawin nnek.

22 Fhem aya xenni, a cek i ittun Arebbi,

ḥima war cek tmezzqeɣ am war din ittiři ufekki.”

23 Wenni dd-ittawyen taɣarṣt n uqadi, ittegg ayi ccan,

u issewjad abrid ḥima ad as ssecneɣ asenjem n AREBBI.