49
1 I umeqqran n imeɣnajen. Zeg ayt n Quraḥ. Azehhed. 2 Sřem i uya, marra řegnus,
sḥessem marra, a imezdaɣ n temmurt,
3 am tarwa n Adam, am tarwa n ijj n weryaz,
aytbab n wagřa d imezřaḍ jmiɛ ak-d wayawya!
4 Aqemmum inu issawař tiɣit,
ixarriṣen n wuř inu ccuren s řefhamet.
5 Necc ad wceɣ amezzuɣ inu i wawař iweznen,
ad ssargbeɣ tḥajit inu n twafit ɣar tirart n řgambri. ■
6 Mayemmi i ɣa ggʷedeɣ deg wussan iɛeffanen,
xmi dd ayi tᵉttenneḍ řmuɛṣiyyet n yinni d ayi dd-iḍeffaren di tiri inu. □
7 Aqa din inni ittcařen x řeksibet nsen,
u ttfeyycen s wagřa nsen ameqqran,
8 maca uřa d ijj n tawmat war izemmar ad ifdi ijj n weryaz,
war izemmar ad ixeǧeṣ ttaman n weṣřaḥ n yixef nnes i AREBBI. □
9 Řefdiyyet n řeɛmar nsen tiɣřa aṭṭas,
war dd-tᵉttis i řebda,
10 ḥima netta ad iddar i řebda,
ɛemmarṣ war iẓarr anḍeř.
11 Maɣar ittwařa imiɣisen mmuten,
maca abuhaři d uqeffuḥ ad ttwaqessen s tnayen,
ad jjen řeksibet nsen i inneɣni awarni asen.
12 Axarreṣ n wuř nsen aqa tudrin nsen ad qqiment i řebda,
tizeddiɣin nsen zi jjiř ař jjiř.
Waxxa uřa d timmura ggin asent ismawen nsen.
13 Bnadem s marra ccan nnes, war ittɣimi ca,
netta yarwes di řmař nni yegguren ɣar qeṭṭu.
14 Wa d abrid i ɣarsen, min xef ttsennaden,
uca inni ten iḍeffaren ad jjiwnen s uqemmum nsen. Silah. □
15 Am wuǧi ssareyyḥen nitni ixef nsen di řaxart,
řmewt ad ten tarwes.
Imseggaden ad xasen ḥekmen x ṣṣbeḥ,
uca addud nsen ad idweř i řɣecc di řaxart,
ttwassuffɣen nitni zi tzeddiɣt nnes. □
16 Maca AREBBI ad ifdi řeɛmar inu zeg ufus n řaxart,
maɣar Netta ad ayi yawi akis. Silah. □
17 War tteggʷed ca mařa ca n weryaz idweř d bu-wagřa,
mařa acuwwar n taddart nnes yarni,
18 maɣar di řmewt nnes war akides ikessi ca marra aya,
acuwwar nnes war ihekkwi akides awarni as.
19 Waxxa ittwabarek řeɛmar nnes di tudart nnes,
waxxa nitni ad cek ssemɣaren maɣar teggid min iṣebḥen i yixef nnek,
20 aqa ad dd-yaweḍ řeɛmar nnes ɣar jjiř n řejdud nnes,
nni war ẓarren tafawt i řebda.
21 Bnadem s tecrimt, maca war ifehhem,
netta am řebhimet ifennan.