1 I umeqqran n imeɣnajen. Zeg ayt n Quraḥ.

S lharpat ittwarriglan ɣar sennej. Izři.

2 AREBBI d amcan n tarewřa d jjehd i neccin.

Aqa iban-dd ittic afus aṭṭas di řeḥṣarat.

3 S uyenni war netteggʷed ca,

waxxa ad tbeddeř tammurt,

ad nhezzan idurar deg wuř n řebḥur,

4 ad hajant řḥemřat nnes, ad ggent akuffu,

ad nhezzen idurar s unneqřeb nnes! Silah.

5 Tiɣzarin n yeɣzar ad ssfarrḥent tandint n AREBBI,

Zzawect Iqeddsen n Tzeddiɣin n Umɛuǧi x kuřci.

6 AREBBI aqa-t di řwest nnes, war tᵉttenhezza,

AREBBI ad as iwc afus xmi dd ɣa tessij tuffut.

7 Řegnus muzzaren, tigeldiwin nhezzent.

Netta igga tmijja nnes ad tᵉttwaseř, tammurt aqa tefsi.

8 SIDI n řɛeskarat aqa-t akidneɣ,

AREBBI n Yaɛqub d lburj nneɣ yuɛřan. Silah.

9 Asem-dd, xzarem timegga n SIDI,

Netta i iggin timesřayin issaggʷaden x temmurt.

10 Netta issbedda imenɣan ɣares ař aneggar n temmurt,

Netta ad yarẓ řqews u iccat lansa di iwetwiten,

ikarruten issecmaḍ i-ten s tmessi.

11 Sbedd, snem illa aqa Necc d AREBBI.

Necc ad ttwasgeɛɛdeɣ jar řegnus,

Necc ad ttwasgeɛɛdeɣ x temmurt.

12 SIDI n řɛeskarat aqa-t akidneɣ,

AREBBI n Yaɛqub d lburj yuɛřan i neccin. Silah.