45
1 I umeqqran n imeɣnajen. S teɣnint n ‘Tlillicin’. Zeg ayt n Quraḥ. Axemmi. Izři n tayri. □
2 Zeg wuř inu idduqqez-dd ijj n wawař d aṣebḥan,
qqareɣ i Ujeǧid min dd-sswejdeɣ,
iřes inu d řeqřem n ijj n umarir imeḥḍen. □
3 “Cek tecnid x marra tarwa n bnadem,
řxaḍar ittwazeǧeɛ x iyencicen nnek,
s uyenni i cek ibarek AREBBI i řebda.
4 Byes ssif x tmessaḍt nnek, a bu-teɣruḍt,
tissiqt nnek d řɛezz nnek.
5 Řɛezz nnek, iři tfeřḥed,
ndeh di ṭṭweɛ n wawař n tidett,
zi ssibbet n řeḥṣaret n umsegged.
Afus nnek afusi ad Cek isseřmed timesřayin ssaggʷadent.
6 Fřitcat nnek qeḍɛent,
- wah řegnus ad wḍan sadu ufus nnek - ,
cuqqent uř n řɛedyan n Ujeǧid.
7 Řkursi nnek igellden, a AREBBI, aqa-t i řebda qaɛ.
Taɣɣarct n tgeldit nnek d ict n teɣɣarct n tsegda. ■
8 Cek tᵉttexsed tasegda u tcarrhed řɣar.
S uyenni i Cek idhen, a AREBBI, AREBBI nnek,
s zzect n řefraḥet tiwa i iɛciren nnek.
9 Marra řeɛbayat nnek amecnaw mirru d wecfiř d řqarfa,
zi řeqṣur n řɛaj ssfarraḥent Cek □
10 yessis n ujeǧid jar tinewjiwin nnek iweqqaren,
tasřit n Ujeǧid tbedd ac x ufusi,
s werruḍ zeg wureɣ iɣřan qaɛ zi Ufir.
11 Seř, a yeǧi, xzar, ewc amezzuɣ nnem!
Ttu řgens nnem d taddart n babam!
12 Xenni Ajeǧid ad immeẓri deg waẓri nnem,
maɣar Netta d Sidi nnem!
Aḍar zzates!
13 Yeǧis n Ṣur s ict n tarzeft,
ayt n bu-wagřa n ijj n řgens ad arzun ad xam arḍan. ■
14 Yeǧis n Ujeǧid aqa-tt d aɛuǧi marra ɣar daxeř,
arruḍ nnes d ijj n umudi zeg ufiřu n wureɣ.
15 Ad tᵉttwandeh ɣar Ujeǧid deg warruḍ s tintat ifarzen.
Tiɛzariyyin tinni tt iḍeffaran,
aqa atent d timeddukkař nnes nni dd ɣarek ttwawyent.
16 Aqa ttwawyent s řefraḥet d warceq,
ammu i ɣa adfent ɣar řeqṣar n Ujeǧid.
17 Tarwa nnek ad iřin deg wemcan n ibabaten nnek,
Cek ad ten tegged d řḥukkam di marra tammurt.
18 Necc ad idareɣ Isem nnek di kuř jjiř d kuř jjiř awarni as.
S uyenni, ad Cek qadan marra řegnus i řebda qaɛ.”