44
1 I umeqqran n imeɣnajen. Zi ayt n Quraḥ. Axemmi. 2 A AREBBI, neccin nesřa tt s imezzuɣen nneɣ,
ibabaten nneɣ ḥajan aneɣ tt:
Cek teggid ict n tmeggit d tameqqrant deg wussan nsen,
deg wussan n wecḥař uya.
3 S ufus nnek aqa tessuffɣed řegnus zi tesɣart nsen,
xenni teẓẓud ten dayes.
Cek teggid řɣar di ccuɛub,
tbezzɛed ten. ■
4 Nitni maca war warten tammurt s ssif,
aɣiř nsen war d asen dd-yiwi asenjem,
maca afus nnek afusi, aɣiř nnek d tfawt n wudem nnek,
minzi ufin arḍa di tiṭṭawin nnek.
5 Aqa Cek d Ajeǧid inu, a AREBBI!
Ewc ɛad řexxu řumur i isenjamen n Yaɛqub.
6 Akidek ad neɣḍeř inni d aneɣ iḥeṣṣaren,
s Yisem nnek ad neɛfes x yenni xaneɣ ittemɛařan.
7 Maɣar war ttecřeɣ x řqews inu,
ssif inu war d ayi issenjam.
8 Maɣar Cek tessenjamed aneɣ zeg inni d aneɣ iḥeṣṣaren,
tessbehdiřed inni d aneɣ icarrhen.
9 Nṣebbeḥ i AREBBI ass marra,
ad nqada Isem nnek i řebda. Silah.
10 Maca řexxu tenḍared aneɣ u tessbehdařed aneɣ,
Cek war tᵉtteffiɣed ca ak-d řɛeskarat nneɣ ɣar umenɣi. ■
11 Cek tejjid aneɣ nettrakkwař zzat i wenni d aneɣ iḥeṣṣaren,
u inni d aneɣ icarrhen ttkeccḍen min texsen i yixef nsen.
12 Cek tewcid aneɣ am wuǧi i macca,
tezzuzzared aneɣ jar řegnus.
13 Cek tezznuzid řgens nnek s walu,
u deg uzzenzi nsen war ɣarek bu řefḍeř.
14 Cek tᵉttegged aneɣ d řḥegra i wajjaren nneɣ,
d astehzi d ubehdeř ɣar yenni d aneɣ-dd ittennḍen. ■
15 Cek tᵉttegged aneɣ d amedya jar řegnus,
tᵉttegged ad xaneɣ hezzen azeǧif jar ccuɛub.
16 Ass marra řɛar inu aqa-t zzati jar tiṭṭawin inu,
řeḥya idřa aɣembub inu,
17 zi ssibbet n řḥess n yinni isseḥqaran u ttceqqafen,
zi ssibbet n řeɛdu d wenni yarezzun antaqem.
18 Aya marra ikka xaneɣ, maca war Cek nettu,
war nɣecc ca di Řɛahd nnek.
19 Uř nneɣ war idwiř ɣar ḍeffar,
iṣuraf nneɣ war dd-ffiɣen ca zeg umesruq nnek,
20 waxxa Cek třebzed aneɣ deg wemcan n wuccanen n řexřa,
u tedřid aneɣ s tiři n řmewt.
21 Mři tuɣa nettu Isem n AREBBI nneɣ,
nesswiẓẓeḍ ifassen nneɣ ɣar yijj n arebbi d aɣrib,
22 ma iři AREBBI war yarezzu di man aya?
Aqa Netta yareggeb x min innuffaren deg wuř.
23 Maɣar di ṭṭweɛ nnek neqqen aneɣ kuř ass,
aqa ḥessben aneɣ am wuǧi n tɣarṣt. ■
24 Faq, mayemmi tᵉṭṭṣed, Sidi inu?
Faq, war d aneɣ neṭṭar i řebda!
25 Mayemmi i ɣa teffared udem nnek,
ad tᵉttud řeɣben d ddeǧ nneɣ?
26 Maɣar řeɛmar nneɣ ittaḍar ɣar tɛejjajt,
aɛeddis nneɣ iřeṣṣeq di temmurt.
27 Kkar, ewc aneɣ afus,
fdi xaneɣ di ṭṭweɛ n tmexsiwt nnek icewwaren. □