1 I umeqqran n imeɣnajen. Azehhed n Dawud.

2 Sseɛd n wenni ifehhmen i umarxu.

SIDI ad t ifekk deg wass n řɣar.

3 SIDI ggur ad t iḥḍa u ad t yejj ad iddar,

uca netta ad yarr meẓri di temmurt.

War t ttsellam ca ɣar min din iǧan di řeɛmar n řɛedyan nnes.

4 SIDI ad kides ibedd di tassut n řehřac.

Cek tᵉttbeddřed marra rectu nnes umi iheǧec.

5 Necc nniɣ: “A SIDI, ḥinn xafi, sgenfa řeɛmar inu,

maɣar xḍiɣ akic.”

6 Řɛedyan inu ssawařen xafi s řɣar:

“Meřmi i ɣa immet u ad ittwakkes isem nnes?”

7 Mařa yusa-dd ḥed maḥend ad iẓar, issawař di řbaṭeř.

Uř nnes issmun ɣares řɣecc,

xenni itteffeɣ ɣar barra, issawař.

8 Marra inni d ayi icarrhen temtamnen xafi jmiɛ,

aqa-ten ttxarriṣen dayi maḥend ad ayi ggen řɣar.

9 Iřqef i-t actab abarcan,

u wenni dd-iwḍan ammu, war dd-ittekkar ɛad.

10 Uřa d aryaz nni wi ak-d ddareɣ di řehna,

wenni di ttiqqiɣ, wenni iccen aɣrum inu,

aqa issemɣar xafi anirz nnes. ^■  

11 Cek maca, a SIDI, ḥinn xafi u snekkar ayi-dd,

xenni necc ad ten xeǧṣeɣ.

12 S man aya ad ssneɣ aqa usiɣ ac-dd i cek x řxaḍar,

maḥend řeɛdu inu war zzayi ifarreḥ s usřiwřew.

13 U xafi, aqa Cek tticed ayi afus di ssibbet n řekmaret inu,

tessbedded ayi zzat i wudem nnek i řebda.

14 Ad ittwabarek SIDI, AREBBI n Israil,

zi řebda ař i řebda! Amin, wah amin!