40
1 I umeqqran n imeɣnajen. N Dawud. Azehhed. 2 Ssitimeɣ qaɛ x SIDI.
Netta yarra-dd ɣari s uzeǧif,
issḥess ɣar uɣuyyi inu.
3 Netta issgeɛɛed ayi-dd zeg ijj n wanu ineqqen,
zeg ubeǧaɛ d ubaryuḍ,
Netta issars iḍaren inu x teṣḍart,
issemten iṣuraf inu.
4 Netta igga ayi ijj n yezři d amaynu deg uqemmum inu,
ijj n izři n uṣebbeḥ i AREBBI.
Aṭṭas ad t ẓaren, ad tecřen x SIDI.
5 Sseɛd n weryaz ijehden wenni ittecřen x SIDI,
wenni war ittmeyyřen ɣar ayt n bu-nnfaxet,
uřa ɣar yenni iweddaren ɣar uxarriq.
6 Aṭṭas, a SIDI, AREBBI inu, d lmuɛjizat nni teggid,
uřa d min tenwid xaneɣ.
Uřa d ijj izemmar ad iɛbar ixef nnes akidek.
Necc ad tent hajiɣ, ad zzaysent ssiwřeɣ.
Aqa nitenti deg waṭṭas war zemmaren ad ttwaḥesben.
7 War texsed taɣarṣt d tewhibt n řɣiǧet.
Cek tarzmed imezzuɣen inu.
Taɣarṣt n wecmaḍ d tɣarṣt n ddenb war tent tᵉttared. ■
8 Xenni nniɣ: “Xzar, Necc ad dd-aseɣ,
deg wedlis ittwannḍen yura xafi.
9 Necc ɣari meẓri, a AREBBI, ḥima ad ggeɣ min texsed Cek.
Ccariɛa nnek aqa-tt di daxeř n inu.” ■
10 Necc ttbarrḥeɣ řexbar aṣebḥan n tsegda nnek
deg wegraw n řgens ameqqran.
Xzar, war tteqqneɣ iyencicen inu, a SIDI, Cek tessned t. ■
11 War ttxemmřeɣ tasegda nnek daxeř deg wuř inu,
ssawařeɣ x tidett nnek u x usenjem nnek.
Tamexsiwt nnek icewwaren d řaman i dayek
war ten ssnuffareɣ deg wegraw n řgens ameqqran.
12 Cek, a SIDI, war xafi tessbeddid arreḥmet nnek.
Ejj tamexsiwt nnek icewwaren d řaman i dayek ad ayi ḥḍant řebda.
13 Maɣar war izemmar ad ittwaḥeṣṣeb řɣar i d ayi iquwwaren,
řmuɛṣiyyat inu ttmenɛen ayi-dd,
dewřeɣ war ttwiřiɣ ɛad s man aya.
Aqa-tent d aṭṭas x ucewwaf n uzeǧif inu,
uř inu ittefciř.
14 A SIDI, ad ac yarḍa ḥima ad ayi tessnejmed,
a SIDI, deɣyat ḥima ad ayi tewced afus.
15 Ejj inni yarezzun řeɛmar inu ḥima ad t teḥḥan,
ad ttwaxarweḍen, ad ssnufaren ixef nsen jmiɛ,
ejj inni ifarrḥen deg uɛeddeb inu
ad dewřen ɣar ḍeffar u ad ttwasbehdřen. ■
16 Ejj i-ten ad ttwareddǧen am uxeǧeṣ i řefḍiḥet nsen i iggin,
inni din iqqaren: “Ha, ha!”
17 Ejj marra inni xak yarezzun ad arren meẓri, ad zzayek farḥen.
Ejj inni ittexsen asenjem nnek ad inin řebda: “SIDI d ameqqran!”
18 Necc di řeɣben u zeřḍeɣ, maca Sidi inu iɛqeř xafi.
Cek d wenni d ayi iwcin afus d wenni d ayi issnejmen.
A AREBBI inu, war ttɛeṭṭař ca.