1 I umeqqran n imeɣnajen. I Yadutun. Azehhed n Dawud.

2 Nniɣ: “Necc ad kkareɣ ad ḥḍiɣ ibriden inu zi ddenb n yiřes inu,

ad ṭṭfeɣ aḥeṭṭu ɣar uqemmum inu s ict n tecmant,

min ɣa yekk uɛeffan zzati.”

3 Necc dewřeɣ am weynaw u řeḥḥfeɣ ixef inu s useɣd,

bekmeɣ uřa x řxar,

maca řeḥriq inu tuɣa yarenni.

4 Uř inu idweř iḥemma di daxeř inu,

tᵉttwasareɣ ict n tmessi ɣar unixses inu.

Xenni ssiwřeɣ s yiřes inu:

5 “A SIDI, scen ayi aneggar inu,

man iǧa řqedd n wussan inu,

ḥima ad ssneɣ mammec arxfeɣ.

6 Xzar, Cek tarrid ussan inu am icbaren n ufus,

tazzuggart n tudart inu zzat i Cek axmi d walu.

Kuř bnadem, mammec ma ibedd imten,

nican am ict n tayyut.” Silah. ^■  

7 Iwa, bnadem iggur am ijj n řexyař,

wah, am ict n tayyut ammu i ittraḥ ittas-dd.

Netta issmun, war issin man wen t i ɣa iksin ɣares.

8 U řexxu min ɣa ssitmeɣ, a Sidi inu?

Aqa necc ttrajiɣ Cek!

9 Fekk ayi zi marra ixeṭṭan inu,

war d ayi ttegg ca d tiseḍḥac i ubuḥaři.

10 Necc dewřeɣ am weynaw, war arezzmeɣ aqemmum inu,

maɣar d Cek i iggin aya.

11 Ksi zzayi jjriḥect nnek,

aqa fenniɣ s uṭeffu iḥeṣṣaren n ufus nnek.

12 Mařa tseggded ca n weryaz s tiyyita di ssibbet n řmuɛṣiyyet nnes,

xenni tessfesyed acewwar n waddud nnes am tcinda.

Iwa kuř bnadem ad ifna am ict n tayyut. Silah.

13 Seř i tẓaǧit inu, a SIDI, u sḥess i uɣuyyi inu.

War ttebkim ɣar imeṭṭawen inu,

maɣar aqa ayi d abarrani, d amɛezzeb ɣarek, am marra řejdud inu. ^■  

14 Sḥeyyed xafi maḥend ad ceɛceɛeɣ ɛad s řefraḥet,

qbeř ad raḥeɣ u war da ttiřiɣ ɛad.