38
1 Azehhed n Dawud. I řidaret. 2 A SIDI, war d ayi ttɛaqab deg uduqqez n weɣḍab nnek,
war d ayi ttweddab s wesɛar nnek. ■
3 Maɣar fřitcat n řqews nnek udfent dayi,
afus nnek ittzeyyar xafi.
4 War din iqqim min iǧan ikemmřen di arrimet inu zeg wesxeḍ nnek,
war iqqim min iṣeḥḥen deg ixsan inu zi ssibbet n ddenb inu. □
5 Maɣar řmuɛṣiyyat inu geɛɛdent ayi ɣar uzeǧif inu,
deqqřent xafi am ijj n ddqeř imɣar aṭṭas.
6 Iyezzimen inu daysen arriḥet u geyyḥen s tubbuheřya inu.
7 Dewřeɣ qewseɣ, dewřeɣ ɣenseɣ ař ṭṭarf.
Ass marra ggureɣ deg warruḍ n wecḍan d abarcan.
8 Maɣar ttaciɣ tijɛinnatin inu arɣint s tmessi marra,
war din iqqim min iǧan ikemmřen di arrimet inu.
9 Necc jemmdeɣ u ttwaɣeḍřeɣ qaɛ,
sɣuyyuɣ s zzhir n wuř inu.
10 A Sidi inu, marra min di ɣari meẓri aqa-t zzatek,
asqinfi inu war zzayek ittnuffar.
11 Uř inu iddendun, marra jjehd iffeɣ ayi,
uřa d tafawt teffeɣ zi tiṭṭawin inu,
wah uřa d nitenti war ɣari beddent ɛad.
12 Imɛizzen inu d imeddukkař inu bedden arendad inu ɣar jjriḥect inu,
uřa d inni i dd ayi yudsen ttaggʷejen xafi.
13 Inni yarezzun ad kksen tudart inu,
nedyen ayi tixecfin,
inni yarezzun ad ayi ggen řɣar,
ssawařen am mmeẓren ad areddǧen,
nitni ceřɣen s řɣecc ass marra.
14 Necc maca tteggeɣ ixef inu axmi d adehcur,
am weynaw nni war yarezzmen aqemmum nnes.
15 Necc am weryaz war ittesřin,
wenni war ɣar iǧi twarrit zeg uqemmum nnes.
16 Maɣar ttrajiɣ Cek, a SIDI,
Cek ad dd-tarrid, a Sidi inu, a AREBBI inu!
17 Maɣar nniɣ: “Ejj i-ten war xafi farrḥen,
xmi i ɣa farɣen iḍaren inu,
ejj i-ten war ssemɣaran ixef nsen xafi.
18 Maɣar necc aqa ggur ad nqarḍeɣ,
řeḥriq inu aqa-t řebda zzati.
19 Maɣar ssargbeɣ ac řmuɛṣiyyet inu,
aqa ttwaḥeṣṣareɣ zi ddenb inu. ■
20 Řɛedyan inu ddaren, aqa aten s tzemmar,
aṭṭas iǧan inni d ayi icarrhen břa ssibbet.
21 Inni itarran řxar s řɣar ssbedden ixef nsen ḍidd inu,
umi necc arezzuɣ x min iṣebḥen.
22 War dayi semmeḥ, a SIDI, AREBBI inu,
war xafi ttaggʷej.
23 Deɣyet ḥima ad ayi tewcid afus,
a Sidi inu, asenjem inu.