37
1 N Dawud. Alif. War tᵉttwareqq tefqeḥt nnek x iɛeffanen,
war ttasem x yenni itteggen řɣecc. ■
2 Maɣar ad wḍan deɣya am arrbiɛ,
u am arrbiɛ aziza ad sřawen.
3 Bit. Ttceř x SIDI u egg řxar,
zdeɣ di temmurt u iři d amtiqqi.
4 Arr meẓri di SIDI,
u Netta ad cek iwc min di ittmeẓri wuř nnek.
5 Gimel. Arr ticři nnek ɣar SIDI,
ttcař xas u Netta ad tt igg. ■
6 Netta ad isseḍhar tasegda nnek am tfawt,
řḥeqq nnek am iceɛciɛen n tfuct di ṭṭḥa n uziř.
7 Dalit. Susem zzat i SIDI u raja t.
War ttejji tafqeḥt nnek ad tasem
x wenni ifeřhen deg webrid nnes,
x weryaz nni itteggen taḥraymect.
8 Hi. Ejj aɣḍab nnek ad yars u ejj asɛar nnek ad iraḥ.
War ttejji tafqeḥt nnek ad tasmed.
Man aya ad yawi mɣir tuɛeffna waha.
9 Maɣar iɛeffanen ad ttwateḥḥan,
maca inni issitimen x SIDI ad warten tammurt.
10 Waw. Mɣir cwayt waha uca aɛeffan war ittɣimi ɛad.
Ad tḥekkared mliḥ wemcan nnes,
maca war din ittiři ɛad.
11 Imhinen ad warten tammurt,
ad arren meẓri di řehna ameqqran. ■
12 Zayin. Aɛeffan ittxarreṣ di tmeɛmač tiḥraymiyyin ḍidd i umsegged,
ittɣezz xas tiɣmas.
13 Sidi inu iḍeḥḥec xas,
maɣar ittwařa aqa ass nnes ad dd-yas.
14 Xit. Iɛeffanen jebden-dd ssif u meḥḍen řqews,
ḥima ad ɣeḍřen řmeskin d umezřuḍ,
ḥima ad ɣarṣen i yenni igguren deg webrid nsen nican.
15 Ssif nsen ad ten iřqef deg wuř nsen,
řeqwas nsen ad ttwarẓen.
16 Tit. Drus i ɣares ɣar umsegged,
ḥsen zeg ufeyyeḍ n waṭṭas n iɛeffanen.
17 Maɣař iɣaǧen n iɛeffanen ad ttwarẓen,
maca SIDI ad isenned imseggaden.
18 Yud. SIDI issen ussan n yinni igguren nican,
tasɣart nsen ad teqqim i řebda.
19 War ttwaqemmiḥen di řweqt taɛeffant,
deg wussan n řaẓ ad ttwasjiwnen.
20 Kaf. Maɣar iɛeffanen ad fnan,
řɛedyan n SIDI ad weddaren,
ad ttwaqḍan amecnaw wenni iǧan iɣřan qaɛ zeg izmaren iqebbuzen,
ad ḍwen di tayyut.
21 Lamed. Aɛeffan yareṭṭeř, war ittarri amarwas,
maca amsegged ittḥinn, ittic.
22 Maɣar inni zzayes ittwabarken ad warten tammurt,
maca inni zzayes ittwaneɛřen, ad ttwateḥḥan.
23 Mim. Iṣuraf n weryaz ijehden ttwasmettnen zi SIDI,
Netta yareṭṭa x webrid nnes.
24 Mařa iwḍa, war ittmenḍar,
maɣar SIDI iwca as afus nnes.
25 Nun. Necc tuɣa ayi d ameẓyan, řexxu wsareɣ,
maca ɛemmarṣ war ẓriɣ amsegged ittwajj,
niɣ tarwa nnes arezzun x weɣrum.
26 Ass ikmeř ittḥinna u yařeṭṭeř i imezřaḍ,
zzariɛet nnes ad tiři i lbaraka.
27 Samix. Ḥeyyed x řɣar u egg řxar,
uca ad ɣarek tiři tzeddiɣt i řebda qaɛ.
28 Maɣar SIDI ittexs řḥeqq,
war isemmeḥ deg imtiqqan nnes.
Ad ttwaḥḍan i řebda qaɛ,
maca zzariɛet n iɛeffanen ad tᵉttwateḥḥa.
29 Imseggaden ad warten tammurt,
ad dayes zedɣen i řebda.
30 Pi. Aqemmum n umsegged ittbarreḥ s tiɣit,
iřes nnes issawař s řḥeqq.
31 Ccariɛa n AREBBI nnes deg wuř nnes,
iṣuraf nnes war ttefriɣen. ■
32 Tsadi. Aɛeffan iřebbet i umsegged,
yarezzu ad t ineɣ,
33 maca SIDI war zzayes yarexxu afus nnes,
war xas iḥkem xmi t ɣa iḥakem.
34 Quf. Sitim x SIDI u ṭṭef deg webrid nnes.
Netta ad cek issgeɛɛed ḥima ad twarted tammurt.
Ad tẓared aqa iɛeffanen ad ttwateḥḥan.
35 Rix. Necc ẓriɣ ijj n uɛeffan d bu-řexcunet,
imeqqar amecnaw tacejjart n tengelt tazizawt. □
36 Aqa iɛdu, uca xzar, war t tuɣi ca ɛad din.
Arzuɣ xas, maca idweř war iǧi ɛad.
37 Cin. Ḥḍa x wenni iǧan ikmeř u xezzar ɣar wenni igguren nican,
maɣar aneggar n weryaz nni ad yiři d řehna.
38 Inni ittɛeddan ggur ad ttwareddǧen jmiɛ,
min iqqimen n iɛeffanen ad ittwateḥḥa.
39 Taw. Asenjem n imseggaden ad dd-yas zi SIDI,
aqa Netta d jjehd nsen di řweqt n řeḥṣaret.
40 SIDI ad asen iwc afus u ad ten ifekk.
Netta ad ten ifekk zeg iɛeffanen u ad ten issenjem,
maɣar nitni ttiqqan dayes.