1 I umeqqran n imeɣnajen. Zeg umsexxar n SIDI. N Dawud.

2 Axeṭṭu n uɛeffan issawař daxeř deg wuř inu:

“War ɣares tiggʷudi n AREBBI zzat i tiṭṭawin nnes.”

3 Minzi axeṭṭu aya issḥinnab i-t di tiṭṭawin nnes,

ařami yufa aqa řmuɛṣiyyet nnes tarra i-t-i-dd ɣar wecrah.

4 Awařen n uqemmum nnes aqa aten d řɣecc d wecmat,

netta issbedd ad yarzu řefhamet ḥima ad igg řxar.

5 Ittxemmem di řɣecc di qama nnes,

iggur ad ibedd deg ijj n webrid war iṣebḥen.

Řɣar war t ittmenḍir.

6 A SIDI, tamexsiwt nnek icewwaren tiweḍ ař ijenwan,

řaman nnek ař iseynuten. ^■  

7 Tasegda nnek tegga am idurar n Arebbi,

řeḥkamat nnek am waman yuǧɣen.

SIDI issenjam bnadem d řmař.

8 Mecḥař tiɣřa tmexsiwt nnek icewwaren, a AREBBI,

ařami tarwa n bnadem tarekkwařen ɣar tiři n wafriwen nnek.

9 Ttwasjawnen s ufeyyeḍ s tadunt n Taddart nnek,

ijj n yeɣzar s nnɛami nnek tewced asen maḥend ad zzayes swen.

10 Maɣar ɣarek i iǧa řɛunṣar n tudart,

di tfawt nnek aqa nettwařa tafawt.

11 Swiẓẓeḍ tamexsiwt nnek icewwaren x yenni i Cek issnen,

tasegda nnek x yenni i ɣar iǧa wuř iseggmen.

12 War ttejji ad xafi dd-yas uḍar n ayt n bu-nnfaxet,

war ttejji afus n iɛeffanen ad ayi dd-yarr ad tellɛeɣ mani mma.

13 Aqa din i wḍan inni itteggen řmuɛṣiyyet,

ttwaɣeḍřen ɣar temmurt u war zemmaren ɛad ad kkaren ɛawed.