35
1 N Dawud. Mcubbec, a SIDI, ak-d yenni akidi ittemcubbucen,
mneɣ ak-d yenni kidi ittmenɣan.
2 Ṭṭef taseddart n useřqi d tseddart tameqqrant,
uca kkar, ewc ayi afus.
3 Jbed-dd lansa uca qqen abrid qbeř i umsagar ak-d yenni dd ayi iḍaffaren,
ini i řeɛmar inu: “Asenjem nnek aqa d Necc!”
4 Arr inni yarezzun x řeɛmar inu ad ttwaxarewḍen u ad ttwafeḍḥen,
ejj inni ittxarriṣen di řɣar xafi ad ttwaɛarrnen ɣar ḍeffar,
ejj i-ten ad dewřen ttseḍḥan. ■
5 Ejj i-ten ad dewřen am icarfa deg uṣemmiḍ,
ejj Lmalak n SIDI ad ten iɛarn. ■
6 Ejj ad idweř webrid nsen d taǧest u ad yiři itteḥřuǧuḍ,
ejj Lmalak n SIDI ad ten iḍfar.
7 Maɣar břa ssibbet ssnuffaren xafi aḥfur s tracca nsen,
břa ssibbet ɣzin t i řeɛmar inu.
8 Ejj areddeǧ ad xas dd-yas břa ma issen,
ejj tracca nnes nni issnuffar ad t tᵉṭṭef simant nnes,
ejj i-t ad dayes dd-iwḍa simant nnes,
s ijj n uweṭṭu i t i ɣa yareddǧen.
9 Řeɛmar inu ad ifarḥ zi SIDI,
ad yarceq deg usenjem nnes.
10 Ad inin marra ixsan inu:
“A SIDI, man wen iǧan am Cek!
Cek d wenni issenjamen řmeskin zeg wenni xas ijehhden,
řmeskin d umezřuḍ zeg inni d asen ikeccḍen.
11 Icehhaden iqṭaṭɛiyyen kkaren.
Min war ssineɣ, ttseqsan ayi.
12 Arrin ayi-dd řɣar di řxar,
řeɛmar inu ittmeḥḥen s řeḥwej.
13 Necc maca arḍeɣ taxancet řami tuɣa heǧcen,
ggiɣ ad iẓumm řeɛmar inu,
uca taẓaǧit inu tᵉttɣima teddekkwař-dd ɣari di daxeř inu.
14 Axmi t tuɣa d ameddukkeř inu niɣ d uma,
ammu i tuɣa ggureɣ,
amecnaw ca n ijj iceṭṭ x yemmas,
ammu tuɣa ayi ggureɣ ɣennseɣ deg warruḍ d abarcan.
15 Xmi ttqejdiḥeɣ, farrḥen nitni u ttmunen ak-d wayawya.
Ttmunen ḍidd inu inni n wadday, břa ma ad t ssneɣ.
Ceqqfen dayi, war ssusmen.
16 Amecnaw inni iɣeṭṭṣen bnadem i yijj n uřeqquz n weɣrum,
ammu ɣezzan-dd ɣari tiɣmas.
17 A Sidi inu, ař mecḥař i ɣa tekked txezzared waha?
Senjem ayi zeg wareddeǧ nsen i iggin,
ayenni inu zeg weyraden imeẓyanen.
18 Necc ad Cek qadiɣ deg yijj n wegraw n řgens d ameqqran,
ad Cek ṣebbḥeɣ jar ijj n řgens imɣar aṭṭas. ■
19 Inni iǧan d řɛedyan inu di řbaṭer,
war ten ttejji ad xafi farḥen,
inni d ayi icarrhen,
war ten ttejji ad xafi mmseɣmazen břa ssibbet. ■
20 Maɣar nitni war ssiwiřen ca x řehna,
maca ttxarrṣen deg wawařen ccuren s řɣecc
ḍidd inni yarezzun řhudnet di temmurt.
21 Nitni arezzmen aqemmum nsen qaɛ,
qqaren: “Ha, ha, tiṭṭ nneɣ simant nnes teẓra i-tt!”
22 A SIDI, Cek teẓrid tt, war ttesqara, Sidi inu,
war xafi tteggʷij ca.
23 Faq, kkar di ṭṭweɛ n řḥeqq inu,
a AREBBI inu d Sidi inu, di ṭṭweɛ n ddeɛwet inu.
24 Ḥkem xafi s řḥeqq ɛlaḥsab tasegda nnek, a SIDI, AREBBI inu,
war ten ttejji ad xafi farḥen.
25 War ttejji ad inin deg wuř nsen: “Ha, aqa aneɣ mliḥ!”,
war ten ttejji ad inin: “Aqa nsarḍ i-t!”
26 Ejj inni ifarrḥen x arẓiyyet inu,
ad ttwaxarewḍen u ad ssnuffaren ixef nsen jmiɛ,
ejj inni iggin ixef nsen mɣaren zzati,
ad yarḍen s useḍḥi d řefḍiḥet.
27 Ejj inni yarḍan di tsegda ad sřiweřwen u ad farḥen,
ejj i-ten ad inin:
“D ameqqran i yeǧa SIDI wenni yarḍan di řehna n umsexxar nnes.”
28 Xenni iřes inu ad ibarreḥ tasegda nnek d uṣebbeḥ nnek ass marra.