34
1 N Dawud, umi issniɛmiř, igga ixef nnes d abuhaři zzat i wudem n Abimilik, wenni i xas yuẓẓřen ařami yuyur netta. ■
2 Alif. Necc xseɣ ad barkeɣ i SIDI řebda,
aṣebbiḥ nnes ad yiři deg uqemmum inu břa qeṭṭu.
3 Bit. Řeɛmar inu ad iṣebbeḥ i SIDI.
Imhinen ad as sřen u ad farḥen.
4 Gimel. Semɣarem akidi SIDI,
ejj aneɣ ad nessuɛřa Isem nnes jmiɛ.
5 Dalit. Necc arzuɣ x SIDI u Netta yarra-dd xafi,
ifekk ayi zi marra tiggʷudi inu.
6 Hi. Nitni xezzaren ɣares uca ceɛceɛen,
iɣembab nsen war ten ttřeḥḥafen ɛemmarṣ.
7 Zayin. Řmeskin-a danita iřaɣa u SIDI isřa ɣares,
ifekk i-t zi marra řeḥṣarat nnes.
8 Xit. Lmalak n SIDI iquwwar s řmargeḥ nnes x yenni t itteggʷeden,
Netta ifekk i-ten.
9 Tit. Qasem d txezzarem, aqa SIDI icna.
Sseɛd n weryaz ijehden wenni xas ittcařan.
10 Yud. Ggʷedem SIDI, a kenniw, imqeddasen nnes,
maɣar inni t itteggʷeden war ten ittxeṣṣi walu.
11 Kaf. Iyraden imeẓyanen tteḥwajen u daysen řaẓ,
maca inni yarezzun x SIDI, war ten ittxeṣṣi walu zi marra min iǧan d řxar. ■
12 Lamid. Asem-dd, kenniw iḥenjiren, sřem-dd ɣari!
Necc ad awem ssřemdeɣ tiggʷudi n SIDI.
13 Mim. Man wen i iǧan d aryaz wenni di iǧa meẓri di tudart,
wenni ittexsen ussan n tudart nnes ḥima ad iẓar řxar? ■
14 Nun. Mneɛ iřes nnek zi řɣar,
uřa d iyencicen nnek zeg wawař n řɣecc.
15 Samix. Ḥeyyed x tuɛeffna u egg řxar.
Arzu x řehna u ḍfar i-t.
16 Ɛayin. Tiṭṭawin n SIDI x imseggaden,
imezzuɣen nnes meyyřen ɣar iɣuyyan nsen. ■
17 Pi. Udem n SIDI ḍidd i yenni itteggen řɣar,
ḥima ad ikkes řidaret daysen zi temmurt.
18 Tsadi. Nitni řaɣan u SIDI isřa-dd ɣarsen,
Netta ifekk i-ten zi marra řeḥṣarat nsen.
19 Quf. SIDI yudes i marra inni umi ittwarẓ wuř nsen,
issenjam inni umi ittwařbez buḥbeř nsen. ■
20 Rix. Aṭṭas iǧan ifeqqusen n imseggaden,
maca SIDI ifekk i-ten zzaysen marra. ■
21 Cin. Netta iḥeṭṭa ixsan nnes marra,
uřa d ijj zzaysen war ittareẓẓi. ■
22 Taw. Aqa řɣar ad ineɣ aɛeffan,
inni icarrhen amsegged ad ttwaɛaqben.
23 SIDI ad ifdi řeɛmar n imsexxaren nnes,
marra inni xas ittcařan, war ggur ad ttwaɛaqben. □