33
1 Sřiweřwem i SIDI, a imseggaden, aṣebbaḥ d ict n telwizt i yenni iseggmen. ■
2 Qadam SIDI s řgambri,
zehhdem as s lharpa u s lɛud n ɛecra n ifiřan.
3 Ɣennjem as s yijj n yezři amaynu,
irarem mliḥ s uṣuḍi di řbuq. ■
4 Minzi awař n SIDI iseggem,
marra min ittegg, ittegg i-t s řaman.
5 Netta ittexs tasegda d řḥeqq.
Tammurt teccur s tmexsiwt icewwaren n SIDI. ■
6 Zeg wawař n SIDI ttwaggen ijenwan,
zi Arruḥ n uqemmum nnes ttwaggent marra řɛeskarat nsen. ■
7 Netta issmun aman n řebḥar amecnaw ijj n weɣbar.
Netta ixemmeř aman yuǧɣen deg ixxamen n řexzen.
8 Ad teggʷed marra tammurt zi SIDI,
ad zzayes ggʷeden marra imezdaɣ n ddunect.
9 Maɣar Netta issawař uca aqa-t din,
Netta ittamar uca ad yiři ibedd din.
10 SIDI ittareẓẓa ccwar n řegnus,
issebḍeř ixarriṣen n řegnus. ■
11 Ccwar n SIDI ad iqqim ibedd i řebda,
ixarriṣen n wuř nnes zi jjiř ɣar jjiř. ■
12 Sseɛd n řgens i ɣar iǧa AREBBI nnes d SIDI,
řgens nni ixḍar i-t Netta d tasɣart i yixef nnes.■
13 SIDI ixezzar-dd zeg ujenna,
ittwařa marra tarwa n bnadem.
14 Zeg wemcan n tzeddiɣt nnes ixezzar
ɣar marra imezdaɣ n temmurt.
15 Netta weḥḥdes d wenni ikewwnen uř nsen,
Netta iḥekkar i marra timegga nsen.
16 Ajeǧid war ittwassenjam s yijj n řɛeskar d ameqqran,
bu-teɣruḍt war ittwafekki s jjehd aṭṭas.
17 Aqa d axarriq belli ayis ad dd-yawi asenjem,
ɛad s jjehd nnes ameqqran war dd-ittenfekki.
18 Xzar, tiṭṭ n SIDI x yenni zzayes itteggʷeden,
x yenni ittrajan tamexsiwt nnes icewwaren, ■
19 ḥima ad ifekk řeɛmar nsen zi řmewt,
ḥima ad ten yejj qqimen ddaren di řaẓ.
20 Řeɛmar nneɣ ittraja SIDI,
aqa Netta d aɛawen nneɣ d taseddart nneɣ i useřqi.
21 Maɣar zzayes ifarreḥ wuř nneɣ,
minzi nettcař x Yisem nnes iqeddsen.
22 Ad xaneɣ tarsa tmexsiwt nnek icewwaren, a SIDI,
ɛlaḥsab mammec i Cek nettraja.