1 N Dawud. Axemmi.

Sseɛd n wenni umi tᵉttwaɣfar tɛeddit nnes,

wenni umi idřin x ddnub nnes. ^■  

2 Sseɛd n weryaz wenni umi war iḥeṣṣeb SIDI řmuɛṣiyyet nnes,

wenni ɣar iǧa buḥbeř war dayes bu řɣecc.

3 Umi sqareɣ, arcan ixsan inu,

s uzehhar inu, ass marra.

4 Maɣar ass d ǧiřet issedqeř ayi ufus nnek ,

idammen n tudart inu dewřen am řaẓaɣ n unebdu. Silah.

5 Ssaregbeɣ ac ddenb inu,

war ssduryeɣ řmuɛṣiyyet inu.

Necc nniɣ: “Ad neɛmeɣ zeg ixeṭṭan inu ɣar SIDI!”,

xenni Cek teɣfared ayi řmuɛṣiyyet n ddenb inu. Silah. ^■  

6 S uyenni marra amtiqqi ad ac isjed di řweqt umi ɣa tejjed bnadem ad Cek yufa.

Xmi din ict n sseḥřet n waman aṭṭas, war t třeqqef qaɛ.

7 Cek d amcan n udurri i necc,

tessared ayi zi řeḥṣaret,

tquwwared ayi s iɣuyyan n řefraḥet n ufekki. Silah. ^■  

8 Necc ad cek ssɣareɣ uca ad ac ssřemdeɣ abrid ittxeṣṣa ad dayes tuyured.

Necc ad cek weṣṣiɣ, ad xak tiři tiṭṭ inu.

9 War ttiři amecnaw ayis,

amecnaw asardun břa řeɛqeř,

inni ittxeṣṣa ad ten qemmɛen s ssrimet d weryam,

niɣ war izemmar ad ɣarek dd-iqarreb. ^■  

10 Aṭṭas ǧant tamara n uɛeffan,

maca wenni ittcařen x SIDI,

ad as iquwwar Netta s tmexsiwt nnes icewwaren.

11 Farḥem di SIDI, arecqem, a imseggaden,

sřiweřwem, a marra inni ɣar iǧa wuř iseggmen!