31
1 I umeqqran n imeɣnajen. Azehhed n Dawud. 2 Necc ttecřeɣ xak, a SIDI,
war ttejji ad seḍḥiɣ i řebda,
fekk ayi s tsegda nnek. ■
3 Ewc ayi amezzuɣ nnek, fekk ayi deɣya.
Iři d Taṣḍart ijehden i necc,
ijj n lburj ḥima ad ayi tessnejmed.
4 Maɣar Cek d Taṣḍart inu d lburj inu.
Ndeh ayi, thilla dayi di ṭṭweɛ n Yisem nnek.
5 Fekk ayi zi tracca nni xafi ggin s tnuffra,
maɣar Cek d jjehd inu.
6 Deg ufus nnek i ggiɣ buḥbeř inu.
Cek tefdid ayi, a SIDI, Arebbi d amtiqqi Cek. ■
7 Necc carrheɣ inni ittceɣřen ixef nsen s řexyařat ibeṭṭiřen.
Necc ttecřeɣ x SIDI.
8 Necc ad arecqeɣ u ad farḥeɣ zi tmexsiwt nnek icewwaren,
minzi Cek tᵉttwařid řeɣben inu u tareggbed x řeḥṣarat inu,
9 minzi war d ayi tarrid ɣar ufus n řeɛdu inu,
maca teggid ayi ttasiɛ ɣar iḍaren inu.
10 Ḥinn xafi, a SIDI, maɣar ttwaḥeṣṣareɣ,
tiṭṭ inu d řeɛmar inu d uɛeddis inu aqa fecřen.
11 Maɣar tudart inu tkemmeř s wecḍan,
iseggʷusa inu s uzehhar.
Jjhed inu iheyyef zi řmuɛṣiyyet inu,
ixsan inu aqa arcan.
12 I marra inni d ayi iḥeṣṣaren dewřeɣ d astehzi,
i jjiran inu qaɛ aṭṭas,
i imqarraben inu dewřeɣ d ijjen i issnexřiɛen.
Inni d ayi ittwařin deg webrid, ttrakkwařen zzayi. ■
13 Ttun ayi s wuř am yijj n umettin,
dewřeɣ amecnaw iceqfan n weqdiḥ,
14 maɣar sřiɣ aqa aṭṭas ceqqfen dayek,
assiggʷed tuɣa itenneḍ ayi-dd umi xafi ggin tameɛmuč.
Tuɣa arezzun ad kksen tudart inu.
15 Maca necc ttecřeɣ xak, a SIDI,
qqareɣ: ‘Cek d AREBBI inu!’
16 Ikuden inu aqa aten deg ufus nnek.
Senjem ayi zeg ufus n řɛedyan inu u zeg inni d ayi iḍeffaren,
17 Ejj udem nnek ad yegg tafawt x imsexxaren nnek,
senjem ayi s tmexsiwt nnek icewwaren.
18 A SIDI, war ttejji ad dewřeɣ ttseḍḥiɣ,
maɣar xak i ttřaɣiɣ.
Arr iɛeffanen ad dewřen ttseḍḥan,
arr i-ten ad ssusmen di řaxart.
19 Ejj ad sqaren iyencicen issxarriqen,
inni issawařen s nnfaxet ḍidd i umsegged,
s uɛeffar d useḥqar.
20 Mecḥař imeqqar řxar nnek i txemmřed i yenni Cek itteggʷeden,
wenni tesswejded i yenni ɣarek dd-yarekkwařen zi tarwa n bnadem! ■
21 Cek tessdduryed i-ten s uřeḥḥaf n wudem nnek,
zi nnfaxet n bnadem.
Cek tessnuffared i-ten di texzant,
zeg umcubbec n iyencicen.
22 Ad ittwabarek SIDI,
maɣar Netta yarra ayi-dd tamexsiwt nnes icewwaren d řeɛjeb,
deg ict n tendint ifaryen.
23 Necc deɣya nniɣ: “Necc ttwaqesseɣ zi zzat i tiṭṭawin nnek!’
Maca ɛad Cek tesřid i tmijja n uḥeccem inu umi dd xak řaɣiɣ.
24 Sɛizzem SIDI, marra imtiqqan nnes,
maɣar SIDI iḥeṭṭa x yenni ittamnen,
u wenni itteggen s nnfaxet, ittxeǧeṣ i-t s ufeyyeḍ.
25 Iřim d iryazen u Netta ad daywem yegg uř,
wah, marra inni ittrajan SIDI. ■