1 Azehhed, izři n udeccen n taddart n Dawud.

2 Necc ad Cek ssuɛřiɣ, a SIDI,

maɣar Cek tessgeɛɛded ayi,

war tejjid ca řɛedyan inu ad farḥen x weɛrur inu.

3 A SIDI, AREBBI inu, necc řaɣiɣ ac,

uca Cek tessgenfid ayi.

4 A SIDI, cek tessuɛřid řeɛmar inu zi řaxart,

tarrid ayi-dd ɣar tudart jar yenni dd-ihekkwan deg weḥfur.

5 Zehhdem i SIDI, a kenniw, imtiqqan nnes,

qadam maḥend ad tɛeqřem x tqeddast nnes. ^■  

6 Maɣar aɣḍab nnes ittekk drus waha,

maca arḍa nnes ittɣima marra tudart.

Di tmeddit aqa din imeṭṭawen ař ǧiřet,

maca ɣar tuffut aqa din asřiwřew.

7 Deg ufřaḥ inu nniɣ:

“War ttefariɣeɣ ca i řebda!”

8 A SIDI, di řxaḍar nnek tessmetned adrar inu s umetten ijehden,

maca umi třeḥḥfed udem nnek, dewřeɣ tteggʷedeɣ.

9 Necc řaɣiɣ ac-dd, a SIDI,

ttareɣ arḍa zi Sidi inu.

10 Man řefḍeř n idammen inu, n uhekkʷu inu deg wenḍeř?

Ma ad Cek tqada tɛejjajt?

Ma ad tbarreḥ s řaman nnek?

11 Seř-dd ɣari, a SIDI, u ḥinn xafi,

a SIDI, iři d amɛawen inu.

12 Cek aqa tarrid tɣuyyit inu n wecḍan d ccḍiḥ s nnubtat,

tessarxud txancet inu n wecḍan,

tessbeysed ayi s řefraḥet,

13 ḥima aɛuǧi inu ad ac izehhed u war ittsusum.

A SIDI, AREBBI inu, necc ad Cek qadiɣ i řebda.