1 Azehhed n Dawud.

SIDI d tafawt inu d usenjem inu,

wi zi ɣa ggʷedeɣ?

SIDI d lqelɛa ijehden i tudart inu,

wi zi ɣa nnxeřɛeɣ ɛad? ^■  

2 Umi ɣari dd-qarrben iɛeffanen ḥima ad ccen ddat inu,

nnqarḍen yinni d ayi iḥeṣṣaren d řɛedyan inu simant nsen

uca wḍan ɣar temmurt.

3 Waxxa ad xafi iḥjem ijj n řɛeskar,

uř inu war itteggʷad ca.

Waxxa ad xafi ikkar umenɣi, ɛad necc ttɣimiɣ ttecřeɣ.

4 Ict n řḥajjet ttareɣ zi SIDI, ta ad xas arzuɣ:

min ɣa kkeɣ ddareɣ ad qqimeɣ ad zedɣeɣ di Taddart n SIDI,

ḥima ad ẓareɣ řeḍrafet n SIDI,

u ḥima ad beqceɣ di Zzawect nnes Tameqqrant.

5 Maɣar Netta issduřuy ayi deg udurri nnes deg wass n řɣar.

Netta issřeqqa ayi deg useřqi n Uqiḍun nnes,

Netta issgeɛɛad ayi x ict n teṣḍart.

6 Řexxu ad ittwasgeɛɛed uzeǧif inu x řɛedyan inu inni d ayi dd-innḍen,

u s uṣuḍi s wesruddeḥ di řbuq ad awyeɣ tiɣarṣa ɣar Uqiḍun nnes,

ad ɣennjeɣ, wah ad zehhdeɣ i SIDI.

7 Seř ɣar tmijja inu, a SIDI, xmi i ɣa řaɣiɣ,

ḥinn xafi u arr-dd xafi.

8 Zzayek i issawař wuř inu: “Arzu x wudem inu!”

Necc arezzuɣ x wudem nnek, a SIDI.

9 War zzayi tteffar udem nnek,

war ttxiyyab amsexxar nnek deg weɣḍab.

Tuɣa Cek d amɛawen inu.

War d ayi ttsemḥed u war d ayi ttejji, a AREBBI n usenjem inu.

10 Maɣar baba d yemma aqa semḥen dayi,

maca SIDI ad ayi iksi ɣares.

11 Scen ayi abrid nnek, a SIDI,

ndeh ayi ɣar webrid iseggmen,

di ssibbet n yinni d ayi iḥeṣṣaren. ^■  

12 War d ayi ttsellem ɣar meẓri deg řeɛmar n yinni d ayi iḥeṣṣaren,

maɣar řechud n ẓur kkaren xafi,

inni i xafi ittṣuḍen s řexcunect.

13 Uh, mařa necc zeɛma war umineɣ ad ẓareɣ řxar n SIDI,

di temmurt n yinni iddaren ...!

14 Raja SIDI, iři d aryaz,

Netta ad dayek yegg uř,

wah raja SIDI. ^■