1 Azehhed n Dawud.

I Cek umi řaɣiɣ, a SIDI, aqa Cek d Taṣḍart inu.

War ttegg ca ixef nnek war ɣari ttesřid,

ařami, s wesqar nnek, war ttarekkwiseɣ ak-d yenni dd-ihekkwan deg wenḍeř. ^■  

2 Seř i tmijja n uḥeccem inu,

xmi xak ttřaɣiɣ,

xmi kessiɣ ifassen inu ɣar Wexxam n Daxeř n Zzawect nnek Iqeddsen.

3 War d ayi ttjarri ak-d iɛeffanen,

ak-d yenni itteggen řmuɛṣiyyet,

inni issawařen x řehna ak-d imqarraben nsen,

am ɣarsen iǧa řɣar deg wuř nsen. ^■  

4 Xeǧeṣ asen ɛlaḥsab min tteggen nitni, ɛlaḥsab tuɛeffna n tmegga nsen.

Xeǧeṣ asen ɛlaḥsab řxedmet n ifassen nsen,

ewc asen řmunet nsen i isdaheǧen,

5 minzi nitni war xezzaren ɣar řefɛayeř n SIDI,

uřa ɣar řxedmet n ifassen nnes.

Netta ad ten iɣḍeř, war ten ibenni ca.

6 Ad ittwabarek SIDI,

maɣar Netta isřa i tmijja n uḥeccem inu.

7 SIDI d řɛezz inu d taseddart inu n useřqi,

uř inu ittceř xas uca ttwaɛawneɣ.

Uř inu ineggez s řefraḥet, s yezři inu ad t qadiɣ.

8 SIDI d jjehd nsen,

Netta d lburj ijehden n isenjimen i umedhun nnes.

9 Senjem řgens nnek u barek tasɣart nnek n řwart,

arwes i-ten u arbu ten i řebda qaɛ.