25
1 Azehhed n Dawud. Alif. A SIDI, ɣarek i dd-ssgeɛɛadeɣ řeɛmar inu.
2 Bit. A AREBBI inu, necc ttecřeɣ xak.
Ejj ayi war ttseḍḥiɣ,
ejj řɛedyan inu war xafi ttesřiwřiwen s řefraḥet. ■
3 Gimel. Wah, marra inni Cek ittrajan
war ttseḍḥin.
Inni iggin s řeɣdar břa ssibbet,
ad seḍḥen. ■
4 Dalit. A SIDI, sscen ayi ibriden nnek,
sɣar ayi imesraq nnek. ■
5 Hi. Ndeh ayi di tidett nnek u sɣar ayi,
minzi Cek d AREBBI n usenjem inu,
necc ssitimeɣ xak ass marra.
6 Zayin. Ɛqeř, a SIDI, x arreḥmet nnek,
u x tmexsiwt nnek icewwaren,
maɣar aqa atent ǧant zi řebda. ■
7 Xit. War ttidar ca ddnub n temẓi inu
uřa d ixeṭṭan inu.
Xemm maca ɣari di tmexsiwt nnek icewwaren,
di ṭṭweɛ n tcuni nnek, a SIDI.
8 Tit. SIDI iṣbeḥ, icna,
s uyenni ad issɣar abrid i imednab.
9 Yud. Netta ad igewwed imhinen s řḥeqq,
Netta ad isseřmed abrid nnes i imhinen.
10 Kaf. Marra imesraq n SIDI aqa aten d tamexsiwt icewwaren d řaman,
i yenni iḥeṭṭan Řɛahd nnes d ccahadat nnes.
11 Lamid. Di ṭṭweɛ n Yisem nnek, a SIDI,
ɣfar řmuɛṣiyyet inu, maɣar aqa-tt d aṭṭas.
12 Mim. Man wen d aryaz i itteggʷeden SIDI?
Netta ad as isseřmed abrid i ittxeṣṣa ad ixḍar.
13 Nun. Řeɛmar nnes ad issens di řxir,
zzariɛet nnes ad warten tammurt.
14 Samix. Řaman i din n SIDI i yenni zzayes itteggʷden,
u Řɛahd nnes maḥend ad asen t issargeb.
15 Ɛayin. Tiṭṭawin inu řebda di SIDI,
minzi Netta ad ifekk iḍaren inu zi tracca.
16 Pi. Arr-dd ɣari s wudem u ḥinn xafi,
maɣar necc aqa ayi weḥḥdi u di řeɣben.
17 Tsadi. Řeḥṣarat n wuř inu aqa mmarnint.
Suffeɣ ayi zi ddiqat i d ayi.
18 Rix. Xzar-dd ɣar řeɣben inu d warber inu,
ksi xafi marra ddnub inu.
19 Rix. Xzar ɣar řɛedyan inu, minzi ttwaktaren,
nitni carrhen ayi s yijj n wecrah iqesḥen.
20 Cin. Ḥḍa x řeɛmar inu u fekk ayi!
War d ayi tejji ca ad seḍḥiɣ, minzi xak i ttecřeɣ.
21 Taw. Ad teḥda ayi řekmaret d řeṣfayet,
maɣar ssitimeɣ dayek.
22 A AREBBI, fdi Israil zi marra řeḥṣarat nnes.