1 I umeqqran n imeɣnajen. Azehhed n Dawud.

2 A SIDI, ajeǧid ifarḥ s jjehd nnek,

u mecḥař ifarḥ s usenjem nnek!

3 Tewcid as meẓri n wuř nnes,

Cek war tugid ca azaweg n iyencicen nnes. Silah.

4 Maɣar Cek tusid-dd i umsagar akides s lbarakat ccurent s řxar,

teqqned as ttaj n wureɣ ittwaṣeffan x uzeǧif nnes.

5 Ittar ac tudart,

tewcid as tt,

tuzzeggart n wussan i řebda qaɛ.

6 Imɣar uɛuǧi nnes s usenjem nnek,

temmarsed xas tissiqt d řɛezz. ^□  

7 Minzi Cek tarrid t d lbaraka tameqqrant i řebda,

Cek teccured t s řefraḥet ɣar wudem nnek.

8 Maɣar ajeǧid ittcař x SIDI,

s tmexsiwt icewwaren n Umɛuǧi x kuřci war ittefriɣ.

9 Afus nnek ad yaf marra řɛedyan nnek,

afus afusi nnek ad yaf marra inni Cek icarrhen.

10 Cek ad ten tarrid amecnaw tafqunt icemmḍen di řweqt n weḍḥar nnek,

SIDI ad ten iṣarḍ s weɣḍab nnes,

timessi ad ten tecc.

11 Ad temḥid řɣiǧet nsen zi temmurt,

zzariɛet nsen jar tarwa n bnadem.

12 Maɣar nitni nedyen ac řɣar, ggin ict n tmeɛmuč,

maca war zemmaren walu.

13 Maɣar Cek ad ten tegged jar tiṭṭawin,

s ifiřan n řqews nnek ad tneyyced x wudmawen nsen.

14 Sgeɛɛed ixef nnek, a SIDI, s jjhed nnek!

Ejj aneɣ ad nɣennej u ad nzehhed i tzemmar nnek.